Markaziy bankning Finlit loyihasi eng munosib bankni tanlash jarayonidagi asosiy mezonlar haqida ma’lumot berdi.
Ishonchliligi
Bankdan istaladigan birinchi narsa uning ishonchliligi, chunki har bir mijoz o‘z mablag‘lari butunlay xavfsizlikda bo‘lishini istaydi.
Shuning uchun, avvalo, siz tanlangan bank o‘z faoliyatini amalga oshirish uchun litsenziyaga egaligiga ishonch hosil qilish kerak. Litsenziyasiz bank o‘z xizmatlarini ko‘rsatish huquqiga ega emas.
Bundan tashqari, internetda, banklar to‘g‘risida mijozlarning izohlarini ko‘rib chiqish mumkin.
Bank xizmatlari arzonligi
Hisob raqamini ochish va operatsiyalar bo‘yicha komission to‘lovlar xarajatlari har bir bankda sezilarli darajada farq qilishi mumkin.
Dastlabki bosqichda eng ko‘p foyda olish uchun eng past narxlarga ega bo‘lgan bankni tanlash kerak - bu pulni tejash va uni biznesni rivojlantirish uchun yo‘naltirishga yordam beradi.
Xizmat sifati
Bank xizmatlarining sifati muhim ahamiyatga ega, chunki sifatsiz xizmatlar tadbirkorlarning bankka ortiqcha qatnashi uchun vaqt sarflashiga va ular faoliyatining samaradorligi bilan bog‘liq muammolarga olib keladi.
Yaxshi bank - masofadan turib hal qilinishi mumkin bo‘lgan kichik savollar bo‘yicha mijozni bankka kelishiga majbur qilmaydigan bankdir.
Bunday holda, hisobni distansion boshqarish, ya’ni, hisob raqam bo‘yicha operatsiyalarni masofadan turib yoki “bank-mijoz” texnologiyasi orqali boshqarish imkoniyatini ko‘rib chiqish kerak.
O‘rnashgan joyi
Bank tanlashda, uning o‘rnashgan joyini ham hisobga olish kerak. Agar biror-bir sababga ko‘ra bankka tez-tez qatnashga to‘g‘ri keladigan bo‘lsa, yaqin joylashgan bankning xizmatlari uchun bir ikki foizga ko‘proq xizmat haqi to‘lash oson va foydaliroq bo‘lishi mumkin.
Imtiyozlar va ko‘maklashish
Biznesga xizmat ko‘rsatuvchi bankni tanlashda, biznes faoliyatini yengillashtiradigan va soddalashtiradigan qo‘shimcha imtiyozlar va imkoniyatlar bo‘yicha qiziqib ko‘rish kerak. Bank tadbirkorlik faoliyati uchun kreditlar berishi yoki yo‘qligini bilib olish zarur.
Agar hozirda, bankdan qarz olish rejasi bo‘lmasa ham, kelajakda biznesni kengaytirish uchun qo‘shimcha mablag‘lar kerak bo‘lishi mumkin. Odatda, xizmat ko‘rsatayotgan bankdan kredit olish foydaliroq.
Avvalroq mikroqarz nima, uni olish tartibi va muddatlari qandayligi haqida xabar berilgandi.
Izoh (0)