“Savdogarbank” o‘z nomini “Garant Bank”ka o‘zgartiradi. Tegishli qaror bank aksiyadorlarining umumiy yig‘ilishida qabul qilindi.
Bank nomi “Garant Bank” aksiyadorlik jamiyati nomiga o‘zgartirilsin hamda bank ustaviga kiritilgan o‘zgartirishlar ilovaga muvofiq tasdiqlansin, — deyiladi qarorda.
Bank boshqaruviga bank nomini o‘zgartirish bilan bog‘liq bo‘lgan barcha chora-tadbirlarni amalga oshirish, o‘zgarishlarni Markaziy bankda ro‘yxatdan o‘tkazish topshirildi.
O‘zbekistonda bank nomlari kamdan kam o‘zgaradi. Oxirgi marta bu 2018-yilda sodir bo‘lgan edi — o‘shanda “UTBank” o‘z nomini “Ziraat Bank”ka o‘zgartirgan edi.
“Savdogarbank” haqida
“Savdogarbank” O‘zbekistondagi kam sonli xususiy banklardan biridir. 1994-yilda tashkil etilgan, 1998-yilda “Yengilsanoatbank” bilan birlashtirilgan.
2022-yil 1-iyun holatiga ko‘ra bank aktivlari 1,3 trillion so‘mni, kapital hajmi 190 milliard so‘mni tashkil etdi.
Fevral oyi oxirida Rauf Komiljonov bankning deyarli yagona egasiga aylandi.
2022-yilning birinchi choragi yakunlari bo‘yicha “Savdogarbank”ning sof foydasi 2,2 milliard so‘mni tashkil qilgan.
Izoh (0)