Rossiya iqtisodiyoti 10 yildan keyingina o‘ziga kelishi taxmin qilindi

Sanksiyalarga uchragan Rossiya iqtisodiyoti yaqin 10 yil ichida o‘ziga kelmaydi. Bu haqda Sberbank rahbari German Gref ma’lum qildi.

Uning so‘zlariga ko‘ra, Rossiyaga qarshi sanksiya qo‘ygan davlatlar Rossiya eksportining 56 foizini, importining 51 foizini tashkil qiladi. Bu mamlakat yalpi ichki mahsulotining 15 foiziga tahdiddir.

Grefning fikricha, Rossiya iqtisodiyoti sanksiyalar fonida mutlaqo kutilmagan moslashuvchanlikni ko‘rsatdi.

Hech kim iqtisodiyotni tarkibiy o‘zgartirish va moslashtirish bunday tezlikda amalga oshishini kutmagan edi, — deydi u.

Grefning so‘zlariga ko‘ra, Rossiyada iqtisodiyoti 2022-yilda sezilarli pasayishga uchraydi, bu 2023-yilda ham kichikroq miqyosda davom etadi.

Bu iqtisodiyotni yangi sharoitlarga moslashtirish narxi. 2024-yildan boshlab, katta ehtimol bilan iqtisodiy o‘sish boshlanadi, uning sifati va tezligi iqtisodiy siyosat qanchalik samarali bo‘lishiga bog‘liq, — deb tushuntiradi u.

Avvalroq Rossiya neft embargosi sabab 30-50 mlrd dollar yo‘qotishi mumkinligi haqida xabar berilgandi.