Россия иқтисодиёти 10 йилдан кейингина ўзига келиши тахмин қилинди

Санкцияларга учраган Россия иқтисодиёти яқин 10 йил ичида ўзига келмайди. Бу ҳақда Сбербанк раҳбари Герман Греф маълум қилди.

Унинг сўзларига кўра, Россияга қарши санкция қўйган давлатлар Россия экспортининг 56 фоизини, импортининг 51 фоизини ташкил қилади. Бу мамлакат ялпи ички маҳсулотининг 15 фоизига таҳдиддир.

Грефнинг фикрича, Россия иқтисодиёти санкциялар фонида мутлақо кутилмаган мослашувчанликни кўрсатди.

Ҳеч ким иқтисодиётни таркибий ўзгартириш ва мослаштириш бундай тезликда амалга ошишини кутмаган эди, — дейди у.

Грефнинг сўзларига кўра, Россияда иқтисодиёти 2022 йилда сезиларли пасайишга учрайди, бу 2023 йилда ҳам кичикроқ миқёсда давом этади.

Бу иқтисодиётни янги шароитларга мослаштириш нархи. 2024 йилдан бошлаб, катта эҳтимол билан иқтисодий ўсиш бошланади, унинг сифати ва тезлиги иқтисодий сиёсат қанчалик самарали бўлишига боғлиқ, — деб тушунтиради у.

Аввалроқ Россия нефть эмбаргоси сабаб 30-50 млрд доллар йўқотиши мумкинлиги ҳақида хабар берилганди.