NATO mamlakatlari hozirgi vaqtgacha Ukrainani himoya qilish uchun yetarlicha harakat qilgani yo‘q. Bu haqda harbiy blokka kiruvchi Yevroittifoq mamlakatlari yetakchilari bilan uchrashuvdan keyin Polsha bosh vaziri Mateush Moravetskiy ma’lum qildi, deb yozadi “RBK”.
“Biz [NATO mamlakatlari] Ukrainani himoya qilish uchun yetarlicha harakat qilmadik. Men bu mamlakatga qurol-yarog‘ yetkazishda davom etishga chaqiraman”, — dedi siyosatchi.
Uning so‘zlariga ko‘ra, Yevropa yetakchilari “Ukraina yengiladigan ssenariyni tasavvur qila olmaydi”. Uning aytishicha, bu variant “G‘arb qadriyatlari halokati”ga aylangan bo‘lardi, u barchani “rus imperializmi”ga qarshi birlashishga chaqirdi.
Bundan tashqari, Moravetskiy Ukrainaning Yevroittifoqqa a’zo bo‘lish yo‘lidagi intilishlarini qo‘llab-quvvatlash o‘ta muhim ekanini ta’kidladi. “Biz ularning iloji boricha tezroq nomzod maqomini olishga intilishlarini qo‘llab-quvvatlaymiz, chunki ukrain xalqiga umid kerak”, — dedi u.
Rossiya Ukrainada harbiy operatsiya boshlaganidan buyon ko‘plab G‘arb mamlakatlari Moskvaga qarshi sanksiyalarning bir nechta paketlarini kiritib ulgurdi. Polsha, xususan, Rossiya bilan gaz yetkazib berish haqidagi bitimni buzdi, Rossiya elchixonasi hisoblarini bloklab tashladi va o‘nlab rossiyalik diplomatlarni mamlakatdan chiqarib yubordi.
Bundan tashqari, nizo boshidan beri Varshava Kiyevga qurol-yarog‘ yetkazish hajmini bosqichma-bosqich oshirdi, shuningdek, boshqa mamlakatlarni ham shunday qilishga chaqirdi. Iyun boshida Polsha bosh vaziri Ukrainaga qurol yetkazish uchun so‘nggi 30 yil uchun rekord darajada bo‘lgan 470 million dollar ajratilishini e’lon qildi.
Izoh (0)