НАТО мамлакатлари ҳозирги вақтгача Украинани ҳимоя қилиш учун етарлича ҳаракат қилгани йўқ. Бу ҳақда ҳарбий блокка кирувчи Евроиттифоқ мамлакатлари етакчилари билан учрашувдан кейин Польша бош вазири Матеуш Моравецкий маълум қилди, деб ёзади «РБК».
«Биз [НАТО мамлакатлари] Украинани ҳимоя қилиш учун етарлича ҳаракат қилмадик. Мен бу мамлакатга қурол-яроғ етказишда давом этишга чақираман», — деди сиёсатчи.
Унинг сўзларига кўра, Европа етакчилари «Украина енгиладиган сценарийни тасаввур қила олмайди». Унинг айтишича, бу вариант «Ғарб қадриятлари ҳалокати»га айланган бўларди, у барчани «рус империализми»га қарши бирлашишга чақирди.
Бундан ташқари, Моравецкий Украинанинг Евроиттифоққа аъзо бўлиш йўлидаги интилишларини қўллаб-қувватлаш ўта муҳим эканини таъкидлади. «Биз уларнинг иложи борича тезроқ номзод мақомини олишга интилишларини қўллаб-қувватлаймиз, чунки украин халқига умид керак», — деди у.
Россия Украинада ҳарбий операция бошлаганидан буён кўплаб Ғарб мамлакатлари Москвага қарши санкцияларнинг бир нечта пакетларини киритиб улгурди. Польша, хусусан, Россия билан газ етказиб бериш ҳақидаги битимни бузди, Россия элчихонаси ҳисобларини блоклаб ташлади ва ўнлаб россиялик дипломатларни мамлакатдан чиқариб юборди.
Бундан ташқари, низо бошидан бери Варшава Киевга қурол-яроғ етказиш ҳажмини босқичма-босқич оширди, шунингдек, бошқа мамлакатларни ҳам шундай қилишга чақирди. Июнь бошида Польша бош вазири Украинага қурол етказиш учун сўнгги 30 йил учун рекорд даражада бўлган 470 миллион доллар ажратилишини эълон қилди.
Изоҳ (0)