Turkiya milliy aviakompaniyasining nomi inglizcha Turkish Airlines’dan turkcha Türkiye Hava Yolları’ga o‘zgartiriladi. Bu haqda Turkiya prezidenti Rajab Toyyib Erdo‘g‘on ma’lum qildi, deb yozadi Meduza turk OAVlariga tayanib.
“[Mamlakatning xalqaro nomi bo‘lgan] Turkey endi yo‘q, u Türkiye bo‘ldi. Endi samolyotlarimiz fyuzelyajiga Turkish Airlines o‘rniga Türkiye Hava Yolları deb yozamiz”, — dedi Erdo‘g‘on.
Rebrending Turkiyaning xalqaro maydondagi nomi Turkey’dan Türkiye’ga o‘zgartirilishiga bog‘liq. Iyun boshida BMT Turkiyaning mamlakat nomini rasmiy hujjatlarda o‘zgartirish so‘rovini ma’qullagan edi.
Turkiya 1923-yilda mustaqillik haqida e’lon qilganidan keyin Türkiye nomini qabul qilgandi.
2021-yilda Rajab Toyyib Erdo‘g‘on turk madaniyatini yaxshiroq ilgari surish uchun Türkiye so‘zidan kengroq foydalanishga chaqirgandi. U, xususan, mamlakatdan eksport qilinadigan mahsulotlarga “Made in Turkey” o‘rniga “Made in Türkiye” deb yozishni talab qildi.
Daily Sabah yozishicha, Anqara xalqaro maydonda Türkiye nomini ilgari surishga qaror qilishiga sabablardan biri ingliz tilida Turkey (Turkiya) so‘zi turkey (“kurka”) so‘zi bilan omonim ekanligidir.
Turkish Airlines 1933-yilda tashkil etilgan bo‘lib, dastlab Davlat aviatsiya ma’muriyati deb atalgan. 1955-yilda kompaniya Türk Hava Yolları deb nomlana boshlagan, samolyotlarga shu nom tushirilgan. O‘sha yili aviakompaniya Xalqaro havo transporti uyushmasi (IATA)ga a’zo bo‘ldi. Aviatashuvchi ma’lumotlariga ko‘ra, 2019-yilda aviakompaniya 74,3 million yo‘lovchini tashigan.
Izoh (0)