Turkmanistonda ayollar uchun kosmetika mahsulotlari sotiladigan do‘konlar tekshirila boshlandi, deb xabar bermoqda “Xronika Turkmenistana” muxbirlari.
Do‘konlardagi javonlardan iste’molchilarning “sog‘lig‘i va tashqi ko‘rinishi”ga zarar yetkazishi mumkin bo‘lgan kosmetik vositalarni olib tashlash talab qilinmoqda.
Sotuvchilar va xaridorlarning so‘zlariga ko‘ra, inspektorlarda aniq ko‘rsatmalar yo‘q va ular nimani sotish mumkin, nima mumkin emasligini ko‘z bilan aniqlayapti.
Odatda ular lak, lab bo‘yog‘i va kipriklar uchun tushni javonlardan olib tashlashni talab qilmoqda. Gigiyena vositalari — shampun, gel va krem sotishga ruxsat berilgan.
Eslatib o‘tamiz, aprel oyida Turkmaniston rasmiylari ayollarning tashqi va ma’naviy qiyofasi uchun qayg‘ura boshlagan edi. Mamlakatda talabalar va o‘quvchi qizlar bilan uchrashuvlar o‘tkazilib, ularga milliy an’analarga rioya qilish zarurligi, soch bo‘yash, makiyaj, kiprik va tirnoq o‘stirish, shuningdek, lablarini kattalashtirish, umuman olganda, haddan tashqari yorqin ranglardan foydalanishga yo‘l qo‘yilmasligi kerakligi aytilgan.
Shuningdek, davlat va budjet tashkilotlarida ishlovchi ayollar bilan ham shunday suhbatlar tashkil etilgan. Bo‘ysunmaganlarga jarima va ishdan bo‘shatish bilan tahdid qilingan.
Shu bilan birga, “Ozodlik” radiosiga ko‘ra, ayollarga shaxsiy avtomashinalarning old o‘rindiqlarida o‘tirish, taksi haydovchilariga esa ayollarga o‘z xizmatlarini taklif qilish norasmiy ravishda taqiqlangan.
Izoh (0)