Rossiya Buyuk Britaniyaning 29 nafar jurnalistini sanksiyalar ro‘yxatiga kiritdi. Ro‘yxatda Britaniyaning bir qator OAV rahbarlari ham bor

Rossiya Tashqi ishlar vazirligi Britaniya ommaviy axborot vositalarida faoliyat olib borayotgan 29 nafar jurnalist hamda mudofaa kompleksining 20 nafar vakilining mamlakatga kirishini taqiqladi.

Jumladan, The Guardian bosh muharriri Ketrin Viner, BBC teleradiokorporatsiyasining raisi Richard Sharp, The Times nashri bosh muharriri Jon Uiterou, siyosatchi Mark Galeotti Rossiya sanksiyalariga uchragan.

Shuningdek Buyuk Britaniya mudofaa vaziri o‘rinbosari Jeremi Kuin (avvalroq mudofaa vaziri Ben Uolles ham Rossiya sanksiyalari uchragandi), harbiy dengiz kuchlari qo‘mondoni Benjamin Ki, harbiy havo kuchlari rahbari Maykl Uigstonga ham taqiqlar qo‘llanilgan.

Rossiya TIV bayonotiga ko‘ra, sanksiyalar ro‘yxatiga tushgan britaniyalik jurnalistlar Rossiya hamda Ukrainadagi urushga oid bir tomonlama va yolg‘on axborot tarqatishga aloqador, mudofaa kompleksi rahbarlari esa Ukrainaga qurol-yarog‘ yetkazib berishda ishtirok etmoqda.

Avvalroq Ukraina prezidenti Vladimir Zelenskiyning Putinga, Rossiya hukumati a’zolari va Rossiya OTMlari rektorlariga qarshi sanksiyalar joriy qilgani, shuningdek, Rossiya TIV AQSHning 61 nafar fuqarosiga, xususan, katta kompaniyalarning top-menejerlari va amaldorlariga sanksiya qo‘llagani xabar qilingandi.