AQSH bo‘g‘ozning maqomi bo‘yicha Xitoy bilan bahsda Tayvanni qo‘llab-quvvatladi

AQSH Tayvanning orolni qit’a Xitoyidan ajratib turuvchi bo‘g‘oz xalqaro suv yo‘li ekanligi haqidagi da’vosini qo‘llab-quvvatladi. Bu haqda Davlat departamenti vakili Ned Prays ma’lum qildi, deb yozadi “RBK”.

“Tayvan bo‘g‘ozi xalqaro suv yo‘li hisoblanadi, bu esa Tayvan bo‘g‘ozi ochiq dengiz erkinligi, shu jumladan, kemalar qatnovi va parvozlar erkinligi xalqaro qonunlarga muvofiq kafolatlanadigan hudud ekanini bildiradi”, — deyiladi xabarda.

Bundan tashqari, davlat kotibi Entoni Blinken AQSH Tayvanga “o‘z-o‘zini mudofaa qilish” sohasida ko‘mak berishda va Pekinning qaroriga ta’sir o‘tkazishda davom etishini ma’lum qildi.

Tayvan — Janubi-Xitoy dengizida, Xitoy Xalq Respublikasi qirg‘oqlaridan taxminan 150 km masofada joylashgan orol. 1949-yilda, inqilob chog‘ida, hudud Xitoydan ajralib chiqqani haqida e’lon qildi, biroq Pekin uni Xitoy provinsiyalaridan biri deb hisoblaydi.

AQSH Tayvan bilan rasmiy diplomatik aloqalarga ega emas, biroq ayni vaqtda unga qurol-yarog‘ sotadi. Rasman AQSH “yagona Xitoy” tamoyilini qo‘llab-quvvatlaydi.

14-iyun kuni Xitoy yetakchisi Si Szinpin harbiy kuchlardan “noharbiy” maqsadlarda foydalanishga ruxsat beruvchi direktivani imzoladi. Radio Free Asia portaliga ko‘ra, shu yo‘l bilan Pekin urush e’lon qilmasdan “maxsus operatsiya” niqobi ostida Tayvanga bostirib kirishga tayyorlanishi mumkin. Farmon 15-iyundan kuchga kiradi va asosiy prinsiplar: qo‘shinlarni tashkil etish, boshqarish, operatsiyalar turlari, tezkor ta’minlash va siyosiy ishlarni, shuningdek, jangovar topshiriqlarni bajarishni tartibga soladi. Shu bilan birga, hujjatda belgilangan maqsadlar qatoriga milliy suverenitet, mintaqaviy barqarorlikni saqlash hamda maxsus operatsiyalarni tashkil etish va o‘tkazishni tartibga solish ham kiradi.