Yangi yil mavsumida Rossiyada vino taqchilligi kuzatilishi mumkin

Ukrainadagi urush sababli bir qator xorijiy kompaniyalar Rossiyani tark etganidan so‘ng, mamlakatda bayram mavsumida vino yetishmay qolishi mumkin. Bu haqda Bloomberg xabar berdi.

Qora dengiz vino kompaniyasi Abrau-Durso prezidenti Pavel Titovning aytishicha, Rossiyada mahsulotlariga talab ortib, zaxiralar tez sotilmoqda.

Bu do‘kon peshtaxtalarida xorijiy vinolarning yetishmasligi, shuningdek, ularning narxi oshishi bilan bog‘liq. Agar talab shu ko‘rinishda qolsa, bu yangi yil mavsumida vino taqchilligiga olib keladi, — dedi Titov.

Rossiyaga qo‘yilgan sanksiyalar to‘g‘ridan to‘g‘ri oziq-ovqat mahsulotlariga ta’sir qilmagan. Lekin bir qator xorijiy savdo va yuk tashish kompaniyalari jahondagi obro‘si tufayli mamlakatni tark etdi.

Nestle’dan Unilever’ga qadar kompaniyalar urushdan keyin Rossiyani butunlay tark etdi yoki mamlakatdagi faoliyatini chekladi. Bu darhol vino importi jarayonini murakkablashtirib, narxi avvalgidan qimmatroq bo‘lishiga sabab bo‘ldi.

Avvalroq O‘zbekistonda mahalliy pivo va tabiiy vinolarni reklama qilishga qisman ruxsat berilgani haqida xabar berilgandi.