“Yandeks” dunyo xaritasida davlat chegaralarini olib tashlaydi

“Yandex.Maps” xizmati dunyoning umumiy xaritasidagi davlatlar chegaralarini olib tashlaydi. Bu haqda kompaniya matbuot xizmatiga tayanib “TASS” xabar bermoqda. 

Yangi xarita fizik-geografik xususiyatga ega bo‘ladi va ko‘proq tabiiy obyektlarga urg‘u beriladi.

Yaqin kelajakda “Yandeks” xaritasi fizik-geografik xususiyatga ega bo‘ladi. Unda urg‘u davlatlar chegaralariga emas, balki tabiiy obyektlarga qaratiladi, — deyiladi xabarda. 

Kompaniyaning aniqlik kiritishicha, yangilanish ham veb-versiyaga, ham mobil ilovaga ta’sir qiladi. O‘zgarishlar asta-sekin paydo bo‘ladi.

Bizning vazifamiz — odamlarga dunyoni ko‘rsatish. Shuning uchun xaritada tog‘lar, daryolar, qutb doiralari chiziqlari va ushbu turdagi xaritaga xos bo‘lgan boshqa ma’lumotlar paydo bo‘ladi, — deydi “Yandeks”.

Avvalroq Yevroittifoq sanksiyalariga uchragan “Yandeks” asoschisi Arkadiy Voloj barcha lavozimlaridan bo‘shagani haqida xabar berilgan edi.