Investitsiyalar va tashqi savdo vazirligida Ispaniyaning Inditex kompaniyasining vakillari bilan uchrashuv bo‘lib o‘tdi. Unda kompaniyaning mamlakatda loyihalarini amalga oshirish imkoniyatlari o‘rganildi.
Uchrashuv ishtirokchilari qo‘shma loyihalarni amalga oshirishni nazarda tutgan holda O‘zbekistonda kompaniya faoliyatini yo‘lga qo‘yish istiqbollarini batafsil muhokama qildilar.
To‘qimachilik sanoati korxonalarining salohiyatini o‘rganish, bozor imkoniyatlarini baholash hamda amaliy hamkorlikning boshqa jihatlari ustida ish olib borish ham rejalashtirildi.
Paxtaga boykotning bekor qilinishi 300 dan ortiq xalqaro brendlar uchun o‘zbek to‘qimachilik mahsulotlarini sotib olishga qaytish imkoniyatini ochdi.
Dastlabki hisob-kitoblarga ko‘ra, bu ishlab chiqarilgan to‘qimachilik mahsulotlari eksportining umumiy hajmini ikki baravar oshirishi mumkin.
Kelajakda bu yerda jahonning yetakchi brendlaridan kiyim-kechak ishlab chiqaradigan fabrikalar paydo bo‘lishi ham mumkin.
Adidas, Tesco, IKEA, Marks & Spencer, H&M, Zara va Gap kabi yirik brendlar o‘zbek paxtasini qaytadan sotib olishni boshlashi kutilmoqda.
Umumiy qiymati 20 mlrd dollarga yaqin aktivlarni boshqaradigan Inditex kompaniyasi tarkibiga Zara, Bershka, Massimo Dutti, Pull&Bear va boshqa eng mashhur to‘qimachilik brendlari kiradi.
Avvalroq spaniyaning Inditex kompaniyasi Rossiyadagi faoliyatini tugatgani haqida xabar berilgan edi.
Izoh (0)