Rossiyaliklar O‘zbekistonda oyiga yuzlab yangi kompaniya ochishni boshladi. Ular ilgari 20-25 ta edi

2022-yilning yanvar—may oylarida O‘zbekistonda Rossiya kapitali ishtirokida 302 ta yangi kompaniya tashkil etildi. Bu Davlat statistika qo‘mitasi ma’lumotida qayd etilgan.

Rossiya katta farq bilan birinchi o‘rinda (ikkinchi o‘rinda turgan Turkiya ishtirokida roppa-rosa ikki baravar kam yangi kompaniya tashkil etildi – 151 ta).

Rossiya ishtirokidagi yangi kompaniyalar soni fevraldan keyin oshdi (yanvarda 23 ta, fevralda 28 ta, martda 56 ta, aprelda 103 ta, mayda 92 ta kompaniya tashkil etildi). O‘tgan yillarda bunday o‘sish kuzatilmagan edi va oyiga 20-25 ta kompaniya ochilardi.

Bu Ukrainada urush boshlangandan keyin ko‘plab rossiyalik tadbirkorlar Rossiyani tark etish, o‘z bizneslarini boshqa davlatlarga ko‘chirishga qaror qilganliklari bilan izohlanadi.

Turkiyalik, xitoylik va boshqa tadbirkorlar tomonidan O‘zbekistonda kompaniyalar ochish sur’ati o‘zgarmagan.

Avvalroq Rossiyalik IT-mutaxassislar O‘zbekistonga intilgani haqida xabar berilgan edi.