Россияликлар Ўзбекистонда ойига юзлаб янги компания очишни бошлади. Улар илгари 20-25 та эди

2022 йилнинг январь—май ойларида Ўзбекистонда Россия капитали иштирокида 302 та янги компания ташкил этилди. Бу Давлат статистика қўмитаси маълумотида қайд этилган.

Россия катта фарқ билан биринчи ўринда (иккинчи ўринда турган Туркия иштирокида роппа-роса икки баравар кам янги компания ташкил этилди – 151 та).

Россия иштирокидаги янги компаниялар сони февралдан кейин ошди (январда 23 та, февралда 28 та, мартда 56 та, апрелда 103 та, майда 92 та компания ташкил этилди). Ўтган йилларда бундай ўсиш кузатилмаган эди ва ойига 20-25 та компания очиларди.

Бу Украинада уруш бошлангандан кейин кўплаб россиялик тадбиркорлар Россияни тарк этиш, ўз бизнесларини бошқа давлатларга кўчиришга қарор қилганликлари билан изоҳланади.

Туркиялик, хитойлик ва бошқа тадбиркорлар томонидан Ўзбекистонда компаниялар очиш суръати ўзгармаган.

Аввалроқ Россиялик IT-мутахассислар Ўзбекистонга интилгани ҳақида хабар берилган эди.