O‘zbekistonda “Ijtimoiy ish to‘g‘risida”gi qonun loyihasi muhokamaga qo‘yildi

Tibbiy-ijtimoiy xizmatlarni rivojlantirish agentligi “Ijtimoiy ish to‘g‘risida”gi qonun loyihasini muhokamaga qo‘ydi.

Ushbu qonunning maqsadi — ijtimoiy xizmatlar keng e’tirof etilgan holda ijtimoiy ishni tashkil etish va bajarish sohasidagi munosabatlarni tartibga solish, ijtimoiy xizmat olishga muhtoj, ehtiyojmand toifadagi shaxslarning huquqlarini kafolatlash, og‘ir turmush sharoitiga tushib qolishning oldini olish va yengib o‘tish, boshqa fuqarolar kabi jamiyat hayotida ishtirok etishlarini ta’minlashdan iborat.

Qonunning asosiy vazifalari quyidagilardan iborat:

• ijtimoiy ishni amalga oshirishning huquqiy, tashkiliy va iqtisodiy asoslarini yaratish;
• ijtimoiy himoya tizimining barcha darajalarida faoliyat ko‘rsatayotgan ijtimoiy xodimlarning vazifalari, vakolatlari, huquq va majburiyatlarini, ularning ma’lumoti, malakasi va ko‘rsatadigan xizmatlariga qo‘yiladigan talablarni belgilash;
• ijtimoiy xodimlarning jamiyatdagi o‘rni va vakolatlarini mustahkamlash;
• davlat boshqaruvi organlari, mahalliy davlat hokimiyati organlari va fuqarolarning o‘zini-o‘zi boshqarish organlari, boshqa davlat tashkilotlari va ularning mansabdor shaxslarining ijtimoiy ish tizimini rivojlantirish va qo‘llab-quvvatlash borasidagi mas’uliyatini oshirish.

Qonun nafaqat ijtimoiy ishlarni bajarish jarayonini tartibga solish, balki uning himoyaga muhtoj (ehtiyojmand) shaxslar/oilalar ijtimoiy-iqtisodiy holatiga ta’sirini tizimli tahlil qilish va shaxslar/oilalar og‘ir turmush sharoitidan chiqib ketishi bo‘yicha ta’sirchan chora-tadbirlar amalga oshirilishini ta’minlaydi.