Toshkent viloyatining Yangiyo‘l tumanida yer savdosi bilan bog‘liq firibgarlik holati fosh etildi, deb xabar beradi Bosh prokuratura huzuridagi departament.
Ma’lum qilinishicha, departamentning Yangiyo‘l tuman bo‘limi tomonidan DXX va IIBB xodimlari bilan hamkorlikda tezkor tadbir o‘tkazilgan. Tadbir davomida A.J. ismli shaxs go‘yoki o‘zining kadastr agentligida ishlovchi tanishlari orqali 29 ming dollar evaziga fuqaro Sh.ning nomiga 40 sotix yer maydonini ajratish uchun hujjatlarni rasmiylashtirib berishni va’da qilgani aniqlangan. U oldindan 10 ming dollar olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) va 28,211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Bo‘stonliqda 1,32 gektar yerni 50 ming dollarga sotishga uringan uch nafar shaxs ushlangani, Samarqandda tuman hokimining soxta qarori bilan qariyb 20 ming dollarga yer sotgan xo‘jalik rahbari aniqlangani, Davlat kadastrlari palatasi Nurobod tuman filiali mutaxassislari 2 mln so‘m pora bilan ushlangani to‘g‘risida xabar berilgandi.
Mavzuga doir:
- Surxondaryoda qishloq xo‘jaligi yerlarida qurilish ishlarini amalga oshirib, 3,1 mlrd so‘mdan ortiq zarar yetkazgan jamiyat rahbari aniqlandi
- Namanganda fuqaroga fermer xo‘jaligi yerini ajratib berish uchun 15 ming dollar so‘ragan hokim yordamchisi va uning sheriklari ushlandi
- Samarqandda 1 gektar yerni 430 ming dollarga sotishga uringan shaxslar qo‘lga olindi
Izoh (0)