Tarix — hayot takrorlardan iborat ekani haqida saboq beruvchi eng yaxshi ustoz; har kunlik bu saboqlardan doim ham vaqtida va to‘g‘ri xulosalar chiqarilmasa-da, tarix baribir beqiyos ustozligicha qolaveradi.
O‘zbekiston va jahonning bundan 60 va 30 yil avvalgi manzarasiga o‘zbek matbuoti ko‘zi bilan imkon qadar nazar solish ham qiziq, ham foydali ko‘rindi. O‘n yillar muqaddam aynan bugungi sanada nimalar bo‘lgan, davr matbuoti ular haqida nima deb yozgan, ushbu voqea-hodisalarga jamoatchilikning munosabati qanday edi — bari “Kun matbuoti tarixi” rukni materiallarida.
60 yil avval. 1962-yil 8-iyun, juma
Senegal bosh vaziri Mamadu Dianing O‘zbekistonga tashrifi davomida etmoqda: u boshliq delegatsiya bir kun davomida Toshkent to‘qimachilik kombinatida, Yangiyo‘l yaqinidagi Qishloq xo‘jaligini mexanizatsiyalash va elektrlashtirish O‘rta Osiyo ilmiy-tadqiqot institutida, Yangiyo‘ldagi “Leninizm” kolxozida (ular bu yerda, jumladan, kolxozning madaniy-maishiy muassasalari bilan tanishgan, shu yerdagi o‘rta maktab va kasalxonada bo‘lgan), Toshkentdagi O‘rta Osiyo va Qozog‘iston musulmonlari diniy nazoratida bo‘lgan.
“Namangan tobora ko‘rkamlashmoqda”, deb boshlanadi muxbir T.Sulaymonovning “Mehnatkashlar uchun” sarlavhali xabari. Xabarda yangi xonadonlarning gazlashtirilganiga alohida urg‘u beriladi.
“1961-yil may oyidan 1962-yil oyigacha kartoshka narxi 2 baravardan ziyod ko‘tarildi”, — deyiladi “Qizil O‘zbekiston”da bosilgan “Angliyada narxlar oshmoqda” xabarida.
30 yil avval. 1992-yil 8-iyun, dushanba
Toshkent davlat universiteti (hozirgi O‘zbekiston Milliy universiteti) saroyida Toshkent davlat texnika universiteti talabalari ishtirokida “Lobar qizlar” ko‘rik-tanlovi bo‘lib o‘tgan. “Ushbu tadbirimiz katta ahamiyatga ega bo‘ldi. Chunki yanvar oyida bo‘lib o‘tgan fojiali voqealardan so‘ng Talabalar shaharchasida birinchi marta bunday bayram o‘tkazilyapti”, — deya universitet prorektori Yodgor Shodmonovning so‘zlaridan iqtibos keltirmoqda “Toshkent oqshomi” (yanvardagi talabalar g‘alayoni haqida avvalroq O‘zbekiston bosh prokurori Bo‘ritosh Mustafoyev ham fikr bildirgan edi).
O‘zbekistonda so‘nggi yillarda bolalar mehnati tugatilgani katta muvaffaqiyat sifatida e’tirof etiladi. Bundan 30 yil avval esa mamlakatda qonuniy bolalar mehnat birjasi bo‘lgan. “Mehnatda toblangan bolalar kelajakda ajoyib inson bo‘lib yetishishlariga shubha qilmasa ham bo‘ladi”, — deyiladi Toshkentdagi bolalar mehnat birjasi faoliyatiga bag‘ishlangan xabarda.
Dunyoda nima gap? Yuriy Lujkov Moskva rahbariga aylangan — u shu bilan 2010-yil sentabrida, Rossiya prezidenti Dmitriy Medvedevning “ishonchini yo‘qotgach” lavozimidan ozod qilinadi.
Mavzuga doir:
- SSSRda hamma narsani kim hal qilishini aytgan Stalin, kirish imtihonlarining 60 yil avvalgi shartlari, “qoqlash va tuzlash bilan hamma shug‘ullanishi kerak”. O‘zbek matbuoti 6-iyunda nimalar haqida yozgan?
- Bosh vazir o‘rinbosari etib tayinlangan Kozim To‘laganov, “yozuvni o‘zgartiramiz deb arosatda qolmaylik”, “nega Amerikada to‘kin-sochinlig-u, bizda defitsit?”. O‘zbek matbuoti 5-iyunda nimalar haqida yozgan?
- Mustaqil O‘zbekistonda ommaviy qabrga kafansiz ko‘milganlar, behayo filmlarga qarshi toshkentliklar, paxta ekish planini bajarib bo‘lgan Ukraina. O‘zbek matbuoti 4-iyunda nimalar haqida yozgan?
Ushbu material huquqlari mualliflarida saqlangan holda e’lon qilish sharti bilan “Daryo” internet-nashriga taqdim etildi
Izoh (0)