Bekor qilingan O‘zbekiston — Argentina o‘rtoqlik uchrashuvi, “Man Yunayted” va “Barselona” o‘rtasidagi YChL finali, katta futbolda nom-nishonsiz yo‘qolgan “Paxtakor-98”. O‘zbek futbol gazetalari 11 yil avval 27-mayda nimalar haqida yozgan?

Futbol – yildan yilga o‘zgarayotgan, takomillashib borayotgan, millionlar emas, balki milliardlar o‘yiniga aylanayotgan sport turi. Internet nashrlar rivojlanib, yangiliklar turli tarmoqlarda uzatilishidan avval barcha sohalarga qatori futbolga oid yangiliklar ham insonlarga televideniye, radio va gazeta-jurnallar orqali yetkazib berilgan.

Xo‘sh, 11 yil avval 27-may kuni o‘zbek futbol gazetalari nimalar haqida yozgan, mulohazalar qilgan, kimlar bilan intervyular uyushtirgan? Bularning barchasi “O‘zbek futboli gazetalari tarixi” ruknida e’lon qilib boriladi.

“Interfutbol” gazetasining birinchi sahifasida “Grandlar yoqqan taftsiz gulxanlar” sarlavhali maqola chiqqan. Unda mas’ul rahbarlardan tortib murabbiylargacha, ommaviy axborot vositalarida chiqayotgan ijobiy xabarlar sabab xotirjamlikka berilishi kerakmasligi aytilgan.

Ta’bir joiz bo‘lsa maqolaning ikkita e’tiborga molik bo‘lgan joyidan birinchisida, jumladan, shunday deyilgan: “... ich-ichimizda boshqa bir ‘men’ bosh ko‘taradi va ‘Baraka topgurlar, futbolning rivoji va ommaviyligi faqat jahon chempionati hamda Olimpiada o‘yinlarida ishtirok etish bilan belgilanmaydi. Ana, Urugvay o‘tmishda uch karra jahon chempioni bo‘lgan. Urugvay futbolini yaqindagina ilk bor jahon chempioni bo‘lgan Ispaniya futboli bilan qiyoslash mumkinmi?’, degan xitob yangraydi”.

Ikkinchi e’tiborga molik jumlaga ko‘ra, “Paxtakor”, “Bunyodkor” va “Sho‘rtan” Osiyo futboli maydonlarini tark etdi, ya’ni musobaqalardan chiqib ketdi. Yagona umid esa – “Nasaf”dan.

O‘ylab qaralsa, so‘nggi ikki yilda ham “Nasaf” yagona umid bo‘lib qolmoqda. Xususan, 2021-yili “Paxtakor” hamda “OKMK” OCHLning guruh bosqichidayoq musobaqani yakunlagan, “Nasaf” esa OFKda finalgacha yetib borgan bo‘lsa, 2022-yilda “Paxtakor” yana OCHLda guruhda qolib ketdi, “Nasaf” pley-offda. OFKda ishtirok etadigan “So‘g‘diyona” esa hali o‘z o‘yinlarini o‘tkazib ulgurmadi.

Aleksey Yevstafeyev boshchiligidagi O‘zbekiston o‘smirlar terma jamoasi Meksikadagi Jahon chempionatiga qizg‘in tayyorgarlik ko‘rmoqda.

Ta’kidlanishicha, Toshkent viloyatining Dukentidagi yig‘in 2-iyungacha davom etadi, 9-iyun kuni terma jamoa Meksika tomon yo‘l oladi.

1998-yilda tug‘ilgan “Paxtakor”chilar Germaniyadagi xalqaro turnirda ishtirok etish uchun uchib ketgan.

Jamoa Bergish-Gladbax shaharchasida o‘tkaziladigan Do‘stlik kubogida ishtirok etadi. Turnirga 17 nafar futbolchi jo‘nab ketgan. Oradan 11 yil o‘tdi, ammo ro‘yxatdagi futbolchilarning birortasi professional darajada bo‘y ko‘rsatgani yo‘q.

O‘zbekiston milliy terma jamoasi 5-iyun kuni Xitoyga qarshi o‘rtoqlik uchrashuvida maydonga tushadi (aslida, ushbu o‘yin 4-iyun kuni bo‘lib o‘tishi aytilgan, biroq futbolchilarning charchab qolmasligi uchun murabbiylar tomonidan o‘yin bir kun keyinga ko‘chirilgan).

Vadim Abramov ishtirokida matbuot anjumani tashkil etilib, unda murabbiy MTJ va OTJning bo‘lajak uchrashuvlari haqida fikr bildirgan. Ta’kidlanishicha, Xitoy o‘rtoqlik uchrashuvi masalasida o‘zi taklif bilan chiqqan, ular hatto Toshkentga kelishi kerak bo‘lgan. Biroq, bu ish amalga oshmagan va O‘zbekistonning o‘zi Pekinga boradi.

E’tiborga loyiq bo‘lgan boshqa jihat ham bor — O‘zbekiston 20-iyun kuni Argentina bilan o‘rtoqlik o‘yini o‘tkazishi kerak bo‘lgan, ammo bu ish ma’lum sabablarga ko‘ra amalga oshmay qolgan. Oradan 11 yil o‘tib ko‘rishimiz mumkin bo‘lgani O‘zbekiston milliy terma jamoasi haliyam Argentina bilan o‘ynamagan.

Angliya futbol assotsiatsiyasi FIFA prezidentligi uchun saylovlarda Zepp Blatterni ham, OFK prezidenti Muhammad bin Hammamga ham saylovlarda ovoz bermasligini ma’lum qilgandi. Bin Hammam esa angliyaliklarni jahon futbolida katta obro‘ga e’tiborga ega ekanliklarini aytib, saylovda ovoz berishga chaqirmoqda.

2011-yilning 28-may sanasida Yevropa Chempionlar Ligasi finali bo‘lib o‘tishi kerak. Unda Angliyaning “Manchester Yunayted”i hamda Ispaniyaning “Barselona”si o‘zaro to‘qnash keladi. O‘yin oldidan jamoalarda imkoniyat qanday, klublarning finalgacha bo‘lgan yo‘li qanday, shular haqida final oldi prevyuda o‘qish mumkin.

Ma’lumot uchun, YChL 2021/2022-yilgi mavsumining finali ham 28-may sanasida o‘tkazilishi belgilangan. Unda Angliyaning “Liverpul”i va Ispaniyaning “Real Madrid”i o‘zaro bahs olib boradi.

“Futbol-Ekspress” gazetasining xabar berishicha, 1996-yilda tug‘ilgan O‘zbekiston o‘smirlar terma jamoasi 9—17-iyun kunlari Ozarbayjondagi Cuspian Cup turnirida ishtirok etadi.

Xabardagi bir jumla ajablanarli: “Aslida mazkur turnirda 1995-yilda tug‘ilgan futbolchilar ishtirok etishi mo‘ljallangandi. Biroq O‘FF ushbu yoshdagi terma jamoaga ega emasligini inobatga olgan holda Ozarbayjonga Dilshod Nuraliyev ustozlik qilayotgan jamoani yuborishga qaror qildi”.

O‘FF terma jamoalar markazi direktori Asqar Tolibjonov Meksikadagi Jahon chempionatining qur’a tashlash marosimiga borib kelgan, shuningdek, mutaxassis musobaqa o‘tkaziladigan hududlarga ham tashrif buyurgan. Uning aytishicha, Meksikagacha bo‘lgan yo‘l ancha uzoq kechgan, xususan, Toshkent—Istanbul—Madrid—Mexiko yo‘nalishida parvoz qilishga to‘g‘ri kelgan.

O‘zbekistonlik muxlislar musobaqaga olib ketiladimi? Terma jamoalar markazi direktorining so‘zlariga ko‘ra, terma jamoa o‘zi bilan muxlislarni olib ketmaydi. 27 soatni o‘z ichiga oladigan uzoq masofa shunday yo‘l tutilishiga majbur qilgan.

O‘FF tartib-intizom qo‘mitasi uchrashuvlarda raqibini haqorat qilgan, raqibiga ataylab jarohat yetkazmoqchi bo‘lgan futbolchilarni jazolagan. Xususan, “So‘g‘diyona” — “Guliston” uchrashuvida yuzaga kelgan holatlar uchun har ikki jamoadan bittadan futbolchi jazolangan. Ta’kidlash joiz, ushbu o‘yinda ko‘p ehtimol kattaroq janjalli voqea yuzaga kelgan.

Shuningdek, “Mash’al-Akademiya”ga qarshi uchrashuvda jamoadoshini haqorat qilgani uchun maydondan chetlatilgan “Jayhun” darvozaboni Aleksandr Lobanov 2 ta o‘yinga diskvalifikatsiya qilingan.

“Chelsi” xo‘jayini Roman Abromovich ixtiyoridagi jamoa boshqaruvidagi jamoa rulini kimga topshirish borasidagi nomzodlarning yakuniy ro‘yxatini belgilab olgan.

Oradan roppa-rosa 11 yil o‘tdi va rossiyalik funksioner Ukraina—Rossiya mojarolari fonida “Chelsi”ni sotib yuborishga majbur bo‘ldi.