Бекор қилинган Ўзбекистон — Аргентина ўртоқлик учрашуви, «Ман Юнайтед» ва «Барселона» ўртасидаги ЕЧЛ финали, катта футболда ном-нишонсиз йўқолган «Пахтакор-98». Ўзбек футбол газеталари 11 йил аввал 27 майда нималар ҳақида ёзган?

Футбол – йилдан йилга ўзгараётган, такомиллашиб бораётган, миллионлар эмас, балки миллиардлар ўйинига айланаётган спорт тури. Интернет нашрлар ривожланиб, янгиликлар турли тармоқларда узатилишидан аввал барча соҳаларга қатори футболга оид янгиликлар ҳам инсонларга телевидение, радио ва газета-журналлар орқали етказиб берилган.

Хўш, 11 йил аввал 27 май куни ўзбек футбол газеталари нималар ҳақида ёзган, мулоҳазалар қилган, кимлар билан интервьюлар уюштирган? Буларнинг барчаси «Ўзбек футболи газеталари тарихи» рукнида эълон қилиб борилади.

«Интерфутбол» газетасининг биринчи саҳифасида «Грандлар ёққан тафтсиз гулханлар» сарлавҳали мақола чиққан. Унда масъул раҳбарлардан тортиб мураббийларгача, оммавий ахборот воситаларида чиқаётган ижобий хабарлар сабаб хотиржамликка берилиши керакмаслиги айтилган.

Таъбир жоиз бўлса мақоланинг иккита эътиборга молик бўлган жойидан биринчисида, жумладан, шундай дейилган: «... ич-ичимизда бошқа бир ‘мен’ бош кўтаради ва ‘Барака топгурлар, футболнинг ривожи ва оммавийлиги фақат жаҳон чемпионати ҳамда Олимпиада ўйинларида иштирок этиш билан белгиланмайди. Ана, Уругвай ўтмишда уч карра жаҳон чемпиони бўлган. Уругвай футболини яқиндагина илк бор жаҳон чемпиони бўлган Испания футболи билан қиёслаш мумкинми?’, деган хитоб янграйди».

Иккинчи эътиборга молик жумлага кўра, «Пахтакор», «Бунёдкор» ва «Шўртан» Осиё футболи майдонларини тарк этди, яъни мусобақалардан чиқиб кетди. Ягона умид эса – «Насаф»дан.

Ўйлаб қаралса, сўнгги икки йилда ҳам «Насаф» ягона умид бўлиб қолмоқда. Хусусан, 2021 йили «Пахтакор» ҳамда «ОКМК» ОЧЛнинг гуруҳ босқичидаёқ мусобақани якунлаган, «Насаф» эса ОФКда финалгача етиб борган бўлса, 2022 йилда «Пахтакор» яна ОЧЛда гуруҳда қолиб кетди, «Насаф» плей-оффда. ОФКда иштирок этадиган «Сўғдиёна» эса ҳали ўз ўйинларини ўтказиб улгурмади.

Алексей Евстафеев бошчилигидаги Ўзбекистон ўсмирлар терма жамоаси Мексикадаги Жаҳон чемпионатига қизғин тайёргарлик кўрмоқда.

Таъкидланишича, Тошкент вилоятининг Дукентидаги йиғин 2 июнгача давом этади, 9 июнь куни терма жамоа Мексика томон йўл олади.

1998 йилда туғилган «Пахтакор»чилар Германиядаги халқаро турнирда иштирок этиш учун учиб кетган.

Жамоа Бергиш-Гладбах шаҳарчасида ўтказиладиган Дўстлик кубогида иштирок этади. Турнирга 17 нафар футболчи жўнаб кетган. Орадан 11 йил ўтди, аммо рўйхатдаги футболчиларнинг бирортаси профессионал даражада бўй кўрсатгани йўқ.

Ўзбекистон миллий терма жамоаси 5 июнь куни Хитойга қарши ўртоқлик учрашувида майдонга тушади (аслида, ушбу ўйин 4 июнь куни бўлиб ўтиши айтилган, бироқ футболчиларнинг чарчаб қолмаслиги учун мураббийлар томонидан ўйин бир кун кейинга кўчирилган).

Вадим Абрамов иштирокида матбуот анжумани ташкил этилиб, унда мураббий МТЖ ва ОТЖнинг бўлажак учрашувлари ҳақида фикр билдирган. Таъкидланишича, Хитой ўртоқлик учрашуви масаласида ўзи таклиф билан чиққан, улар ҳатто Тошкентга келиши керак бўлган. Бироқ, бу иш амалга ошмаган ва Ўзбекистоннинг ўзи Пекинга боради.

Эътиборга лойиқ бўлган бошқа жиҳат ҳам бор — Ўзбекистон 20 июнь куни Аргентина билан ўртоқлик ўйини ўтказиши керак бўлган, аммо бу иш маълум сабабларга кўра амалга ошмай қолган. Орадан 11 йил ўтиб кўришимиз мумкин бўлгани Ўзбекистон миллий терма жамоаси ҳалиям Аргентина билан ўйнамаган.

Англия футбол ассоциацияси ФИФА президентлиги учун сайловларда Зепп Блаттерни ҳам, ОФК президенти Муҳаммад бин Ҳаммамга ҳам сайловларда овоз бермаслигини маълум қилганди. Бин Ҳаммам эса англияликларни жаҳон футболида катта обрўга эътиборга эга эканликларини айтиб, сайловда овоз беришга чақирмоқда.

2011 йилнинг 28 май санасида Европа Чемпионлар Лигаси финали бўлиб ўтиши керак. Унда Англиянинг «Манчестер Юнайтед»и ҳамда Испаниянинг «Барселона»си ўзаро тўқнаш келади. Ўйин олдидан жамоаларда имконият қандай, клубларнинг финалгача бўлган йўли қандай, шулар ҳақида финал олди превьюда ўқиш мумкин.

Маълумот учун, ЕЧЛ 2021/2022 йилги мавсумининг финали ҳам 28 май санасида ўтказилиши белгиланган. Унда Англиянинг «Ливерпуль»и ва Испаниянинг «Реал Мадрид»и ўзаро баҳс олиб боради.

«Футбол-Экспресс» газетасининг хабар беришича, 1996 йилда туғилган Ўзбекистон ўсмирлар терма жамоаси 9—17 июнь кунлари Озарбайжондаги Cuspian Cup турнирида иштирок этади.

Хабардаги бир жумла ажабланарли: «Аслида мазкур турнирда 1995 йилда туғилган футболчилар иштирок этиши мўлжалланганди. Бироқ ЎФФ ушбу ёшдаги терма жамоага эга эмаслигини инобатга олган ҳолда Озарбайжонга Дилшод Нуралиев устозлик қилаётган жамоани юборишга қарор қилди».

ЎФФ терма жамоалар маркази директори Асқар Толибжонов Мексикадаги Жаҳон чемпионатининг қуръа ташлаш маросимига бориб келган, шунингдек, мутахассис мусобақа ўтказиладиган ҳудудларга ҳам ташриф буюрган. Унинг айтишича, Мексикагача бўлган йўл анча узоқ кечган, хусусан, Тошкент—Истанбул—Мадрид—Мехико йўналишида парвоз қилишга тўғри келган.

Ўзбекистонлик мухлислар мусобақага олиб кетиладими? Терма жамоалар маркази директорининг сўзларига кўра, терма жамоа ўзи билан мухлисларни олиб кетмайди. 27 соатни ўз ичига оладиган узоқ масофа шундай йўл тутилишига мажбур қилган.

ЎФФ тартиб-интизом қўмитаси учрашувларда рақибини ҳақорат қилган, рақибига атайлаб жароҳат етказмоқчи бўлган футболчиларни жазолаган. Хусусан, «Сўғдиёна» — «Гулистон» учрашувида юзага келган ҳолатлар учун ҳар икки жамоадан биттадан футболчи жазоланган. Таъкидлаш жоиз, ушбу ўйинда кўп эҳтимол каттароқ жанжалли воқеа юзага келган.

Шунингдек, «Машъал-Академия»га қарши учрашувда жамоадошини ҳақорат қилгани учун майдондан четлатилган «Жайҳун» дарвозабони Александр Лобанов 2 та ўйинга дисквалификация қилинган.

«Челси» хўжайини Роман Абромович ихтиёридаги жамоа бошқарувидаги жамоа рулини кимга топшириш борасидаги номзодларнинг якуний рўйхатини белгилаб олган.

Орадан роппа-роса 11 йил ўтди ва россиялик функционер Украина—Россия можаролари фонида «Челси»ни сотиб юборишга мажбур бўлди.