Hakamni kaltaklagan “Navbahor” futzal jamoasi vakillari 2 yilga chetlatildi

O‘zbekiston futbol assotsiatsiyasi Tartib-intizom qo‘mitasining navbatdagi yig‘ilishi bo‘lib o‘tdi. Unda so‘nggi turlar doirasida bo‘lib o‘tgan uchrashuvlardagi intizomiy ishlar ko‘rib chiqilgani, qabul qilingan qarorlar bo‘yicha bayonot berildi.

Futzal Oliy ligasi 12-turi doirasidagi “Navbahor”—“Metallurg” uchrashuvining 40-daqiqasida hakam tomonidan “Navbahor” o‘yinchisi Doniyor Sotvoldiyevga qizil kartochka ko‘rsatiladi. Shundan so‘ng Namangan jamoasi futbolchisi Ilhom Yusupjonov uchrashuv hakami oldiga borib, o‘z e’tirozlarini qo‘pol tarzda bildiradi va unga nisbatan kuch ishlatadi. Shuningdek, jamoa a’zolari va boshqalar tomonidan janjalli holatni bartaraf etish choralari ko‘rilayotgan vaqtda yana bir “Navbahor” futbolchisi G‘ulomjon Mamajonov ham uchrashuv hakamiga nisbatan kuch ishlatadi. Mazkur uchrashuv internet orqali to‘g‘ridan-to‘g‘ri efirda namoyish etilayotgani, keyinchalik ushbu holat aks ettirilgan videoyozuv ijtimoiy tarmoqlarda tarqalgan va keng jamoatchilik tomonidan jiddiy e’tirozlarga sabab bo‘lgan.

O‘zbekiston futbol assotsiatsiyasi Intizom kodeksining 5.48, 5.49-bandiga asosan “Navbahor” futbolchilari Ilhom Yusupjonov va G‘ulomjon Mamajonovga nisbatan 2 yil muddatga futbol bilan bog‘liq har qanday faoliyatdan chetlashtirish va jarima intizom chorasi qo‘llanildi.

“Navbahor” klubi 2022-yilgi mavsumda O‘zbekiston professional futbol ligasi tomonidan o‘tkaziladigan musobaqalar reglamentining 16.2, 16.3, 16.4-bandlariga rioya qilinmagani uchun klubga ham jarima intizom chorasi qo‘llanildi.

Shuningdek, O‘zbekiston Superligasining 10-turidan o‘rin olgan “Qizilqum”—“Surxon” uchrashuvning 54-daqiqasida mehmonlar futbolchisi Iqboljon Malikjonov bosh hakam tomonidan ogohlantirilgandan so‘ng yon hakam sha’niga haqoratli so‘zlar ishlatgani uchun qizil kartochka bilan jazolangan. Tartib-intizom qo‘mitasining qaroriga ko‘ra, Iqboljon Malikjonovga nisbatan 3 ta o‘yinga diskvalifikatsiya qilish va jarimaga intizom chorasi qo‘llanildi.

Superliganing 10-turi doirasidagi “Dinamo”—“OKMK” uchrashuvning 90+5-daqiqasida olmaliqliklar jamoasi murabbiyi Pavel Bugalo yon hakam sha’niga haqoratli so‘zlar ishlatgani uchun qizil kartochka bilan jazolangan. Tartib-intizom qo‘mitasining qaroriga ko‘ra, Pavel Bugaloga nisbatan 2 ta o‘yinga diskvalifikatsiya qilish va jarima intizom chorasi qo‘llanildi.

U-21 Birinchiligi 9-turi doirasidagi “Surxon”—“So‘g‘diyona” uchrashuvining 78-daqiqasiga kelib “Surxon” jamoasi futbolchisi Asilbek Temirov o‘yin to‘xtatilgan vaqtda raqib o‘yinchisining ko‘krak qismiga urgani va tajovuzkor xatti-harakati uchun qizil kartochka bilan jazolangan. Tartib-intizom qo‘mitasining qaroriga ko‘ra, Asilbek Temirovga nisbatan 3 ta o‘yinga diskvalifikatsiya va jarima intizom chorasi qo‘llanildi.

Birinchi liga 6-turi doirasidagi “Aral”—“Chig‘atoy” uchrashuvining 90-daqiqasiga kelib o‘yin to‘xtatilgan vaqtda “Aral” jamoasi futbolchisi Asad Jumanmuratov raqib o‘yinchisiga nisbatan qilgan tajovuzkor xatti-harakati uchun qizil kartochka bilan jazolangan. Tartib-intizom qo‘mitasining qaroriga ko‘ra, Asad Jumanmuratovga nisbatan 3 ta o‘yinga diskvalifikatsiya va jarima intizom chorasi qo‘llanildi.

Ayollar Oliy ligasi 7-turi doirasidagi “Qizilqum-W”—“Neftchi-W” uchrashuvining 90+2-daqiqasida “Qizilqum-W” jamoasi futbolchisi E’zoza Sharipova jamoasiga nisbatan o‘yin qoidasi buzilgandan so‘ng raqib o‘yinchisi sha’niga haqoratli so‘zlar ishlatgan va qizil kartochka bilan jazolangan. Tartib-intizom qo‘mitasining qaroriga ko‘ra, E’zoza Sharipovaga nisbatan 3 ta o‘yinga diskvalifikatsiya qilish chorasi qo‘llanildi.

O‘FA Tartib-intizom qo‘mitasi