O‘zbekistonda sanoat zonalari infratuzilmasini yaxshilashga o‘tgan yilgidan 2 baravar ko‘p mablag‘ ajratiladi

Shavkat Mirziyoyev 26-may kuni o‘tkazilgan yig‘ilishda qabul qilinadigan qarorlar bilan kerakli shart-sharoitlar yaratib berilishini ta’kidladi. Bu haqda prezident matbuot kotibi xabar qildi.

Qayd etilishicha, eng avvalo sanoat zonalarida bo‘sh turgan 6,6 ming gektar maydonning elektr, suv, yo‘l va boshqa infratuzilma masalalari hal qilib beriladi.

Prezident topshirig‘iga asosan maxsus ishchi guruh sanoat zonalarining infratuzilmasini xatlovdan o‘tkazgan va tuman loyihalar ro‘yxatini shakllantirgan. Shu munosabat bilan mutasaddilar, viloyat hokimlariga:

• bir oy muddatda 40 ta sanoat zonasidagi 120 kilometr yo‘l bo‘yicha pudratchilarni aniqlab, qurilish ishlarini boshlash;
• 1-oktabrga qadar 246 ta sanoat zonasini elektr tarmog‘i, transformator va podstansiyalar bilan ta’minlash;
• joriy yilda 200 ta sanoat zonasida 555 kilometr suv tarmog‘i va 110 ta suv inshootini qurib yakunlash topshirilgan.