Shavkat Mirziyoyev raisligida 26-may kuni o‘tkazilgan yig‘ilishda sanoat zonalarini rivojlantirish borasida hududlarda qilinadigan ishlar ko‘pligi ko‘rsatib o‘tildi. Bu haqda prezident matbuot kotibi xabar qildi.
Qayd etilishicha, 96 ta kichik sanoat zonasining bosh rejasi haligacha tasdiqlanmagani bois ularda 3,5 trillion so‘mlik 648 ta tayyor loyihalar boshlanmasdan turgani ta’kidlangan. Sanoat zonalari maydonlarining 37 foizi elektr, suv, gaz, yo‘l va kanalizatsiya bilan ta’minlanmagani tanqid qilingan.
Shuningdek, sanoat zonalarida loyihalarni boshlash uchun tadbirkorlar 5 ta bosqichli jarayondan o‘tib, 10 turdan ortiq hujjatlarni taqdim etishi lozim (bunga 3 oygacha vaqt sarflanmoqda). Oqibatda hozirda Buxoroda 10 ta, Toshkent viloyatida 5 ta, Samarqand va Farg‘onada 1 tadan loyiha boshlanmasdan turibdi.
“Biz Taraqqiyot dasturimizda kelgusi besh yilda sanoatni 1,4 baravarga oshirishni maqsad qilganmiz. Bu — juda katta marra. Shuning uchun har bir viloyat, tuman va shahar hokimi yangi tashabbuslar ko‘rsatishi, tadbirkorlarni topib, loyihalarni ko‘paytirish bo‘yicha o‘zlarining aniq rejalariga ega bo‘lishlari zarur”, — degan davlat rahbari.
Mavzuga doir:
Izoh (0)