Toshkent viloyatida yuk poyezdi ustiga chiqqan maktab o‘quvchilarini tok urdi

23-may kuni Toshkent viloyati Keles temiryo‘l bekatida vagon ustiga chiqqan ikki nafar maktab o‘quvchisini tok urdi, deb xabar beradi IIV Transport va turizm obyektlarida xavfsizlikni ta’minlash departamenti.

Ma’lum qilinishicha, Qoraqalpog‘iston Respublikasi To‘rtko‘l tumanida yashovchi 14 yoshli R.S. va O.Ch. ota-onalaridan nazoratsiz qolgan vaqtda temiryo‘lda turgan yuk vagonlarining ustiga chiqqan. Shunda ularni vagon ustidan o‘tgan elektr tarmoqlarida mavjud yuqori kuchlanishli tok urib yuborgan.

Mazkur holat yuzasidan Toshkent viloyati Toshkent tumani xalq ta’limi bo‘limiga qarashli 12 va 31-o‘rta ta’lim maktablarida o‘quvchi yoshlar o‘rtasida profilaktik uchrashuv o‘tkazilgan. Yig‘ilishda o‘quvchilarga temiryo‘llarni belgilanmagan joydan kesib o‘tmaslik, harakatdagi poyezd vagonlariga osilmaslik, temiryo‘l izlariga turli jismlarni qo‘ymaslik bo‘yicha ma’lumotlar berilgan.

Eslatib o‘tamiz, 2021-yilning yanvarida Toshkentda poyezd ustida selfi qilmoqchi bo‘lgan 18 yoshli yigitni 27 ming voltli tok urgandi. Oqibatda yigit qattiq jarohatlangan.