Qashqadaryo viloyatining Qarshi shahrida taksi haydovchilari asosiy qatnov yo‘lini to‘sib qo‘ydi. Bu esa avtomobillar harakatiga xalal bergan.
“Daryo” bilan suhbatda bo‘lgan qashqadaryolik bloger Maqsud Muzaffarovning aytishicha, Qarshi shahridagi asosiy yo‘l — Islom Karimov ko‘chasida harakatlanib, Yerqo‘rg‘onga odam tashuvchi taksi haydovchilari xavfsizlik kamari taqmasdan harakatlangani uchun yozilgan jarimalardan norozi bo‘lgan.
Haydovchilarning bloger Maqsud Muzaffarovga yo‘llagan videosiga ko‘ra, ular xavfsizlik kamarini taqmay harakatlangani uchun yozilgan jarimadan norozi bo‘lib, buni bekor qilish taraddudiga tushgan. Va shu bois, yo‘llarni to‘sib, noroziligini bildirgan.
Viloyat IIB axborot xizmati rahbari Javlon Baxtiyevning “Daryo”ga ma’lum qilishicha, Qarshi shahrining Islom Karimov ko‘chasidagi “Sohil bo‘yi” qismida kamera o‘rnatilgan bo‘lib, mazkur kamera 2022-yilning 1-may kunidan boshlab xavfsizlik kamarini taqmay harakatlanayotgan haydovchilarni rasmga olgan. Va shu fotofaktlarga ko‘ra, taksi haydovchilariga ham ma’muriy bayonnomalar rasmiylashtirilgan.
“Aynan shuning uchun avtovokzal tomonda 100 ga yaqin haydovchi to‘planib, viloyat hokimligiga kirmoqchi ekan. Mayli, kirishsin, zora shu bahonada yangi tartibdan xabardor bo‘lib qolishsa”, — deydi voqea haqida yozgan Qitmir muxbir.
Bloger va huquqshunos Xushnudbek Xudoyberdiyevning eslatishicha, yangi tartibga ko‘ra 2022-yilning 1-may kunidan boshlab xavfsizlik kamarini taqmay harakatlangan nafaqat haydovchilarga, old o‘rindiqdagi yo‘lovchilarga ham 135 ming so‘mdan jarima solinishi mumkin.
“Mazkur kamera old o‘rindiqda xavfsizlik kamarini taqmay harakatlangan yo‘lovchiga jarima yozmagan. Bu tartib hozircha faqat haydovchilar uchun tatbiq qilinmoqda”, — deydi Javlon Baxtiyev.
Izoh (0)