Rossiya Ukrainadagi vaziyatni tinch yo‘l bilan tartibga solish bo‘yicha Italiya rasmiylari tomonidan taklif etilgan harakatlar rejasini o‘rganmoqda, deya ma’lum qildi Rossiya tashqi ishlar vazirining o‘rinbosari Andrey Rudenko jurnalistlarga.
Rudenkoning ta’kidlashicha, vazirlik Rimning tashabbuslarini o‘rganib chiqqandan keyin ularni baholaydi.
Italiya Tashqi ishlar vazirligi rejaning BMT bosh kotibi Antoniu Guterrishga topshirilgani haqida may oyi o‘rtalarida e’lon qilgandi. Vazir o‘rinbosari Manlio Di Stefanoning ta’kidlashicha, taklif etilayotgan chora-tadbirlar “o‘t ochishni to‘xtatishga tezda erishish hamda siyosiy va iqtisodiy muvozanatni tiklash uchun global darajada muvofiqlashtirilgan harakatlar orqali” mojaroni hal qilish istiqbollarini o‘z ichiga oladi.
Tinch yo‘l bilan tartibga solish jarayonini Italiya to‘rtta bosqichda amalga oshirishni taklif qilmoqda:
- Birinchi bosqich — o‘t ochishni to‘xtatib, front chizig‘idan qo‘shinlarni olib ketish.
- Ikkinchi bosqich — Ukrainaning NATOga qo‘shilmasligi kafolatlangan holda, Yevroittifoqqa a’zo bo‘lishi (bir qator qo‘shimcha shartlar va majburiyatlar bilan).
- Uchinchi bosqich — Qrim va Donbass bo‘yicha Ukraina va Rossiya o‘rtasidagi ikki tomonlama kelishuv. Italiya rejasi “bahsli hududlar” to‘liq muxtoriyatga ega bo‘lishini nazarda tutadi, shu jumladan, o‘z xavfsizligini ta’minlash sohasida, ammo ayni vaqtda Ukraina suvereniteti saqlanib qoladi.
- To‘rtinchi bosqich — Yevropada tinchlik va xavfsizlik haqida ko‘p tomonlama bitim tuzish.
Rim rejaning bajarilishini nazorat qiluvchi xalqaro guruh tuzishni ham taklif qilgan — uning a’zolari ro‘yxati hali to‘liq tuzilmagan, ammo ular orasida AQSH, Turkiya, Xitoy, Italiya, Germaniya, Fransiya, Kanada, Polsha, Isroil va Kanada bor. Bundan tashqari, reja xalqaro tashkilotlarni, jumladan, BMT va Yevropa Ittifoqini monitoring jarayoniga jalb qilishni nazarda tutadi.
Yevropa Ittifoqi diplomatiyasi rahbari Jozep Borrelning aytishicha, Bryussel o‘t ochishni to‘xtatish bo‘yicha har qanday tashabbusni qo‘llab-quvvatlaydi, biroq buning uchun har qanday shartni Kiyev taklif qilishi kerak.
Germaniya kansleri Olaf Sholsning ta’kidlashicha, Rossiya “harbiy harakatlarni zudlik bilan to‘xtatib, harbiylarini Ukrainadan olib chiqib ketsagina” mojaroni muzokaralar yo‘li bilan hal qilish mumkin.
Izoh (0)