Россия Украинадаги вазиятни тинч йўл билан тартибга солиш бўйича Италия расмийлари томонидан таклиф этилган ҳаракатлар режасини ўрганмоқда, дея маълум қилди Россия ташқи ишлар вазирининг ўринбосари Андрей Руденко журналистларга.
Руденконинг таъкидлашича, вазирлик Римнинг ташаббусларини ўрганиб чиққандан кейин уларни баҳолайди.
Италия Ташқи ишлар вазирлиги режанинг БМТ бош котиби Антониу Гутерришга топширилгани ҳақида май ойи ўрталарида эълон қилганди. Вазир ўринбосари Манлио Ди Стефанонинг таъкидлашича, таклиф этилаётган чора-тадбирлар «ўт очишни тўхтатишга тезда эришиш ҳамда сиёсий ва иқтисодий мувозанатни тиклаш учун глобал даражада мувофиқлаштирилган ҳаракатлар орқали» можарони ҳал қилиш истиқболларини ўз ичига олади.
Тинч йўл билан тартибга солиш жараёнини Италия тўртта босқичда амалга оширишни таклиф қилмоқда:
- Биринчи босқич — ўт очишни тўхтатиб, фронт чизиғидан қўшинларни олиб кетиш.
- Иккинчи босқич — Украинанинг НАТОга қўшилмаслиги кафолатланган ҳолда, Евроиттифоққа аъзо бўлиши (бир қатор қўшимча шартлар ва мажбуриятлар билан).
- Учинчи босқич — Қрим ва Донбасс бўйича Украина ва Россия ўртасидаги икки томонлама келишув. Италия режаси «баҳсли ҳудудлар» тўлиқ мухториятга эга бўлишини назарда тутади, шу жумладан, ўз хавфсизлигини таъминлаш соҳасида, аммо айни вақтда Украина суверенитети сақланиб қолади.
- Тўртинчи босқич — Европада тинчлик ва хавфсизлик ҳақида кўп томонлама битим тузиш.
Рим режанинг бажарилишини назорат қилувчи халқаро гуруҳ тузишни ҳам таклиф қилган — унинг аъзолари рўйхати ҳали тўлиқ тузилмаган, аммо улар орасида АҚШ, Туркия, Хитой, Италия, Германия, Франция, Канада, Польша, Исроил ва Канада бор. Бундан ташқари, режа халқаро ташкилотларни, жумладан, БМТ ва Европа Иттифоқини мониторинг жараёнига жалб қилишни назарда тутади.
Европа Иттифоқи дипломатияси раҳбари Жозеп Боррелнинг айтишича, Брюссель ўт очишни тўхтатиш бўйича ҳар қандай ташаббусни қўллаб-қувватлайди, бироқ бунинг учун ҳар қандай шартни Киев таклиф қилиши керак.
Германия канцлери Олаф Шольцнинг таъкидлашича, Россия «ҳарбий ҳаракатларни зудлик билан тўхтатиб, ҳарбийларини Украинадан олиб чиқиб кетсагина» можарони музокаралар йўли билан ҳал қилиш мумкин.
Изоҳ (0)