Mariupoldagi “Azovstal” zavodida taslim bo‘lgan ukrainalik harbiylarning barchasi hozir Donetsk xalq respublikasi hududida, ularni o‘sha yerda harbiy sudga tortish rejalashtirilgan, dedi respublika rahbari Denis Pushilin.
“Azovstal’ mahbuslari DXR hududida saqlanmoqda. Respublika hududida xalqaro tribunal tashkil etish ham rejalashtirilgan. Hozirda tribunal nizomi ishlab chiqilmoqda”, — dedi Pushulin “Interfaks”ga.
“Azovstal” zavodi ikki oy davomida Mariupoldagi ukrainalik harbiylarning so‘nggi qarshilik markazi bo‘lib turdi. 16-may kuni zavodda mudofaani ushlab turgan harbiylar taslim bo‘lishni boshladi. Ukraina tomoni “Azovstal” himoyachilarini tez orada Kiyev nazoratidagi hududga qaytarishni va’da qildi.
20-may kuni Rossiya Mudofaa vazirligi “Azovstal” hududi va butun Mariupol rossiyalik harbiylarning to‘liq nazorati ostiga olinganini ma’lum qildi. Vazirlik ma’lumotlariga ko‘ra, Ukrainaning “Azov” polki va Qurolli kuchlari harbiy xizmatchilaridan jami 2439 kishi taslim bo‘lgan. Xabar qilinishicha, yaradorlar Novoazovsk shahridagi kasalxonaga, qolganlari Yelenovka qishlog‘iga (ikkalasi ham DXRda) yuborilgan.
Shu bilan birga, Rossiya Tergov qo‘mitasi “Azovstal”ning taslim bo‘lgan himoyachilarini so‘roq qilishini ma’lum qildi, Davlat Dumasi spikeri Vyacheslav Volodin esa “Azov” jangchilarini almashishni taqiqlashni taklif qildi hamda ular “natsist jinoyatchilar” ekanini, sudga tortilishi kerakligini ta’kidladi.
Izoh (0)