Rossiya prezidenti Vladimir Putin Turkmaniston rahbari Serdar Berdimuhamedovni Do‘stlik ordeni bilan taqdirladi, deb yozadi “RBK”. Tegishli farmon huquqiy axborot rasmiy portaliga joylangan.
Hujjatda aytilishicha, Berdimuhamedov “Rossiya va Turkmaniston o‘rtasidagi strategik sheriklikni mustahkamlashga qo‘shgan katta hissasi uchun” taqdirlangan.
8-aprel kuni prezidentlar mamlakatlar o‘rtasidagi diplomatik aloqalarning 30 yilligi munosabati bilan telefon orqali suhbatlashgan, shunda Putin kichik Berdimuhamedovni Rossiyaga taklif qilgan edi. Turkmaniston rahbari bunga rozilik bergan.
12-may kuni Rossiya Federatsiya kengashi raisi Valentina Matviyenko Serdar Berdimuhamedov bilan uchrashuvda unga “Vladimir Putinning salomini yetkazgan va Rossiyaga tashrif bilan kelish taklifini tasdiqlagan edi”.
Serdar Berdimuhamedov — Turkmanistonning avvalgi prezidenti, mamlakatni 15 yil boshqargan Gurbanguli Berdimuhamedovning o‘g‘li. Mart oyida mamlakatda prezident saylovi bo‘lib o‘tdi, unda kichik Berdimuhamedov 72,97 foiz ovoz to‘plab g‘olib bo‘ldi.
Prezident etib saylanguniga qadar Serdar Berdimuhamedov turli davlat lavozimlarida ishlagan. Dastlab Tashqi ishlar vazirligida departament rahbari bo‘lgan, so‘ng tashqi ishlar vaziri o‘rinbosariga aylangan, Axal viloyatiga rahbarlik qilgan va sanoat vaziri bo‘lib ishlagan. Saylov kampaniyasi boshlanishi arafasida u bosh vazir o‘rinbosari va mamlakat Xavfsizlik kengashi a’zosiga aylangandi.
Saylovda g‘olib chiqishidan avval kichik Berdimuhamedov Turkmanistonning betarafligini saqlab qolishga, yaxshi qo‘shnichilik aloqalarini rivojlantirishga va xalqaro tashkilotlar, xususan, BMT bilan hamkorlikni mustahkamlashga va’da bergandi.
2017-yilda xuddi shunday sabab bilan — “Rossiya va Turkmaniston o‘rtasidagi strategik sheriklikni mustahkamlashga qo‘shgan katta hissasi uchun” Putin o‘sha vaqtdagi Turkmaniston prezidenti Gurbanguli Berdimuhamedovni ham taqdirlagandi. Ammo katta Berdimuhamedovga Do‘stlik ordeni emas, balki Aleksandr Nevskiy ordeni berilgan.
Mavzuga doir:
- Turkmanistonda qo‘l ushlashib yurgan yigit-qizlar qo‘lga olinmoqda, ayollarga esa pardoz qilish taqiqlanmoqda. Prezident almashganidan keyin fuqarolarning tashqi ko‘rinishi va xulqi jiddiy nazorat qilinmoqda
- Serdar Berdimuhamedov Turkmaniston MOQ prezidenti lavozimida otasining o‘rnini egalladi
- Turkmanistonda yangi prezident portreti ostida paxta chigitini ekish boshlandi (foto)
Izoh (0)