Shri-Lanka Markaziy banki mamlakat tashqi qarzni to‘lash muddatini o‘tkazib yuborganini tasdiqladi. Bu Osiyo-Tinch okeani mintaqasidagi bir asr ichidagi birinchi suveren defoltdir, deya xabar beradi Financial Times Moody’s agentligiga tayanib.
Ikki xalqaro suveren obligatsiyalar bo‘yicha foizlarni to‘lash uchun 30 kunlik imtiyozli davr 18-may kuni tugadi. Moody’s reytingiga ko‘ra, Osiyoda defoltga uchragan oxirgi suveren qarz oluvchi davlat 1999-yilda Pokiston bo‘lgan.
Prezident Gotabaya Rajapaksa hukumati o‘tgan oy Shri-Lanka yoqilg‘i, dori-darmon va oziq-ovqat kabi import uchun valyuta zaxiralarini saqlash maqsadida xalqaro qarzini to‘lashni to‘xtatishini aytdi.
Shri-Lankaning xalqaro obligatsiyalar egalari, shuningdek, Xitoy, Yaponiya va Hindiston kabi davlatlarda ikki tomonlama kreditorlardan 51 mlrd dollarga yaqin qarzi bor.
19-may kuni bo‘lib o‘tgan brifingda Markaziy bank rahbari Nandalal Verasinh Shri-Lanka kreditorlari endi mamlakatni texnik jihatdan defolt deb hisoblashlari mumkinligini tasdiqladi.
S&P o‘tgan oy Shri-Lankaning xorijiy valyutadagi reytingini o‘tkazib yuborilgan foiz to‘lovlari bo‘yicha defolt darajasiga tushirgan edi.
Tahlilchilarning ta’kidlashicha, global foiz stavkalarining o‘sishi, energiya narxining yuqoriligi va inflyatsiyaning ko‘tarilishi Shri-Lanka kabi importga qaram bo‘lgan rivojlanayotgan iqtisodiyotlarga bosim o‘tkazmoqda.
Avvalroq Shri-Lankada hukumatga qarshi norozilik namoyishlari davom etayotgani haqida xabar berilgan edi.
Izoh (0)