Путин Туркманистон президенти Сердар Бердимуҳамедовни Дўстлик ордени билан тақдирлади

Россия президенти Владимир Путин Туркманистон раҳбари Сердар Бердимуҳамедовни Дўстлик ордени билан тақдирлади, деб ёзади «РБК». Тегишли фармон ҳуқуқий ахборот расмий порталига жойланган.

Ҳужжатда айтилишича, Бердимуҳамедов «Россия ва Туркманистон ўртасидаги стратегик шерикликни мустаҳкамлашга қўшган катта ҳиссаси учун» тақдирланган.

8 апрель куни президентлар мамлакатлар ўртасидаги дипломатик алоқаларнинг 30 йиллиги муносабати билан телефон орқали суҳбатлашган, шунда Путин кичик Бердимуҳамедовни Россияга таклиф қилган эди. Туркманистон раҳбари бунга розилик берган.

12 май куни Россия Федерация кенгаши раиси Валентина Матвиенко Сердар Бердимуҳамедов билан учрашувда унга «Владимир Путиннинг саломини етказган ва Россияга ташриф билан келиш таклифини тасдиқлаган эди».

Сердар Бердимуҳамедов — Туркманистоннинг аввалги президенти, мамлакатни 15 йил бошқарган Гурбангули Бердимуҳамедовнинг ўғли. Март ойида мамлакатда президент сайлови бўлиб ўтди, унда кичик Бердимуҳамедов 72,97 фоиз овоз тўплаб ғолиб бўлди.

Президент этиб сайлангунига қадар Сердар Бердимуҳамедов турли давлат лавозимларида ишлаган. Дастлаб Ташқи ишлар вазирлигида департамент раҳбари бўлган, сўнг ташқи ишлар вазири ўринбосарига айланган, Ахал вилоятига раҳбарлик қилган ва саноат вазири бўлиб ишлаган. Сайлов кампанияси бошланиши арафасида у бош вазир ўринбосари ва мамлакат Хавфсизлик кенгаши аъзосига айланганди.

Сайловда ғолиб чиқишидан аввал кичик Бердимуҳамедов Туркманистоннинг бетарафлигини сақлаб қолишга, яхши қўшничилик алоқаларини ривожлантиришга ва халқаро ташкилотлар, хусусан, БМТ билан ҳамкорликни мустаҳкамлашга ваъда берганди.

2017 йилда худди шундай сабаб билан — «Россия ва Туркманистон ўртасидаги стратегик шерикликни мустаҳкамлашга қўшган катта ҳиссаси учун» Путин ўша вақтдаги Туркманистон президенти Гурбангули Бердимуҳамедовни ҳам тақдирлаганди. Аммо катта Бердимуҳамедовга Дўстлик ордени эмас, балки Александр Невский ордени берилган.