Turkmanistonda yangi prezident portreti ostida paxta chigitini ekish boshlandi (foto)

23-mart kuni Turkmanistonning qator viloyatlarida paxta chigitini ekish boshlandi. Bu haqda “Turkmenistan segodnya” davlat axborot agentligi xabar berdi.

Telereportaj kadrlaridan ko‘rish mumkinki, chigit ekish kampaniyasi yangi prezidenti Serdar Berdimuhamedovning portreti ostida amalga oshirilgan.

Chigit ekishni boshlagan agronom va mullalar qishloq xo‘jaligiga g‘amxo‘rlik ko‘rsatayotgan Arqadag‘ (Gurbanguli Berdimuhamedov) va yangi davlat rahbariga minnatdorlik bildirgan.

Ma’lum qilinishicha, 2022-yilda Turkmanistonda 580 ming gektarga chigit ekiladi, 1,25 million tonna paxta hosilini yig‘ish rejalashtirilgan. Chigit ekish kampaniyasiga 1708 ta traktor va seyalka (urug‘ ekishga mo‘ljallangan mashina), shuningdek, 5517 ta paxta kultivatori va boshqa qishloq xo‘jaligi agregatlaridan foydalaniladi. 485 biolaboratoriya fermerlarni paxta zararkunandalariga qarshi ishlatiladigan biomahsulotlar bilan ta’minlaydi.

Eslatib o‘tamiz, 12-mart kuni Turkmanistonda muddatidan oldingi prezidentlik saylovlari bo‘lib o‘tdi. Unda sobiq davlat rahbarining o‘g‘li Serdar Berdimuhamedov g‘olib bo‘ldi. Saylov kampaniyasi davomida u Turkmanistonning neytral maqomini saqlab qolish, shuningdek, yaxshi qo‘shnichilik munosabatlarini rivojlantirish va xalqaro tashkilotlar, xususan, BMT bilan hamkorlikni mustahkamlashga va’da bergan.