O‘zbekistonda “yashirin iqtisodiyot”ning ulushi yuqori bo‘lgan bir qancha sohalar bor. Bu haqda Axborotlashtirish va aloqa agentligida o‘tkazilgan matbuot anjumanida Davlat soliq qo‘mitasi raisi o‘rinbosari Jahongir Abdiyev ma’lum qildi.
Uning so‘zlariga ko‘ra, bunday sohalarga logistika, brokerlik, kuryerlar va riyeltorlar kiradi. Abdiyev bu muammoni jarima va jazo yo‘li bilan emas, balki muloqot va suhbatlar orqali hal qilish kerakligini ta’kidladi.
Biz qonuniy ishlashga nima to‘sqinlik qilayotganini bilib, shu narsani yo‘q qilishga yordam beramiz, — dedi Davlat soliq qo‘mitasi raisi o‘rinbosari.
Misol tariqasida xizmat ko‘rsatish sohasida, xususan, umumiy ovqatlanishdagi vaziyat keltirildi.
Ko‘pgina kafe va restoranlarda ofitsiantlar ko‘pincha noqonuniy ishlaydi. Davlat soliq qo‘mitasi vakillari bir nechta kafe va restoranlar egalari bilan uchrashib, bunga soliq yukining yuqoriligi sabab bo‘lganini aniqladi. Tez orada ushbu sohalarda yagona ijtimoiy to‘lov stavkasi 1 foizga tushirildi.
Abdiyev soliq qo‘mitasi tomonidan hududlarda o‘tkazilgan yig‘ilishlar haqida ham to‘xtalib o‘tdi. Bunday uchrashuvlarning birida tadbirkorlardan biri noqonuniy ishlashga majbur bo‘lganini, boshqa chora yo‘qligini aytdi.
Biz unga variantlar borligini aytdik, bemalol ishlash va pul topish mumkin bo‘lgan mexanizmlar, vositalar va imkoniyatlarni ko‘rsatdik. Tadbirkor hayron bo‘lib, bularning barchasidan xabari yo‘qligini aytdi, — dedi Abdiyev.
Uning so‘zlariga ko‘ra, soliq organlari hozir transformatsiya qilinmoqda — jazolovchi sifatida emas, balki tadbirkorning yordamchisi va do‘sti sifatida ishlamoqda.
Avvalroq O‘zbekistonda yil boshidan beri xarid chekini ro‘yxatdan o‘tkazgan iste’molchilarga 57,5 mlrd so‘m keshbek to‘langani haqida xabar berilgan edi.
Izoh (0)