26-aprelda Jahon banki o‘zining tovar bozori istiqbollari haqidagi navbatdagi hisobotini e’lon qildi.
Hisobotda Rossiya va Ukraina o‘rtasidagi harbiy mojaro tufayli oziq-ovqat, neft, metallar va boshqa tovarlarning jahon narxlari 2024-yil oxirigacha yuqori darajada saqlanib qolishi bildirilgan.
Umuman olganda, bu 1970-yildan beri butun dunyo boshdan kechirgan eng katta tovar zarbasi. O‘sha paytdagidek, oziq-ovqat, yonilg‘i va o‘g‘itlar bo‘yicha savdo cheklovlarining keskin kuchayishi kuzatilmoqda, — dedi Jahon bankining adolatli o‘sish, moliya va institutlar bo‘yicha vitse-prezidenti Indermit Gill.
Bank 2022-yilda energiya narxi 50 foizdan ko‘proq o‘sishini kutmoqda, ammo 2023—2024-yillarda bu qiymat pasayadi.
2022-yilda energetik bo‘lmagan tovarlar, jumladan, qishloq xo‘jaligi mahsulotlari va metallar narxi qariyb 20 foizga oshadi, keyingi yillarda esa ularning o‘sishi ham sekinlashadi.
Biroq xomashyo narxlari so‘nggi besh yildagi o‘rtacha ko‘rsatkichdan ancha yuqori bo‘lib qolishi kutilmoqda, — deyiladi Jahon banki hisobotida.
Joriy yil natijalariga ko‘ra, bank tahlilchilari oziq-ovqat mahsulotlari narxi 22,9 foizga oshishini kutyapti, biroq 2023-yilda bu narx 10,4 foizga tushishi mumkin.
O‘simlik moylari segmentida eng sezilarli o‘sish kutilmoqda - 29,7 foiz. Bundan tashqari, o‘g‘itlar narxining o‘sishi 69,2 foizga yetishi mumkin, bu esa qishloq xo‘jaligi mahsulotlari narxlarining o‘sishida qo‘shimcha omil hisoblanadi.
Hisobot siyosatchilarni o‘z fuqarolari va jahon iqtisodiyotiga yetkazadigan zararni kamaytirish uchun hozirdan harakat qilishga chaqirish bilan yakunlandi.
Oziq-ovqat va yonilg‘i subsidiyalari o‘rniga pul o‘tkazmalari, maktab ovqatlari va jamoat ishlari dasturlari kabi manzilli ijtimoiy himoya dasturlarini ishlab chiqish taklif etilmoqda.
Energiya samaradorligi, jumladan, binolarni issiqlik izolyatsiyasiga yo‘naltirilgan investitsiyalar asosiy ustuvor yo‘nalish bo‘lishi kerak.
Avvalroq Ukrainadagi urush tufayli butun jahonda iqtisodiy o‘sish pasayishi haqida xabar berilgan edi.
Izoh (0)