Rossiya hozir duch kelgan inqiroz bir yarim yildan ikki yilgacha davom etishi mumkin. Bu haqda Rossiya Hisob palatasi rahbari Aleksey Kudringa tayanib, “TASS” xabar berdi.
Kudrinning so‘zlariga ko‘ra, mamlakat hozir juda noaniq vaziyatda. 2022-yilda inflyatsiya 20 foizdan, 2023-yilda esa 6 foizdan oshishi kutilmoqda.
“Yaqin 1,5-2 yil ichida Rossiya juda og‘ir ahvolda yashaydi. Hozir 2009-yildagi va pandemiya davridagi inqirozdan ham yomonroq vaziyatdamiz”, — dedi Kudrin.
Shuningdek, u bunday sharoitda kuch va resurslarni to‘g‘ri baholash juda muhimligini qo‘shimcha qildi.
2022-yilda Rossiya yalpi ichki mahsulotning pasayishi 8,8 foizdan 12,4 foizgacha kuzatiladi. Inflyatsiya esa bazaviy prognoziga ko‘ra, taxminan, 20,7 foizni tashkil etadi. Narxlarning o‘sishi 2023-yilda 6 foizdan oshishi kutilmoqda.
“Albatta, zanjirlarning uzilishi, ishlab chiqarish tannarxining oshishi, eksportning qisqarishi hududlarimiz iqtisodiyotiga qanday ta’sir qilishini bilmaymiz. Shu bois mintaqamiz iqtisodiyoti hozirgi muammolarga javoban juda tabaqalashtirilgan bo‘ladi” — deb tushuntirdi Hisob palatasi rahbari.
Bu yil Rossiya iqtisodiyotni qo‘llab-quvvatlash uchun, taxminan, 6,3 trillion rubl sarflashni reja qilgan. “Bu Milliy farovonlik jamg‘armasiga tushadigan barcha neft va gaz daromadlari sarflanishini anglatadi”, — deya xulosa qildi u.
Avvalroq Rossiya iqtisodiyoti misli ko‘rilmagan sanksiyalar sharoitida qanday yashayotgani haqida xabar berilgan edi.
Izoh (0)