Ўзбекистонда «яширин иқтисодиёт»нинг улуши юқори бўлган бир қанча соҳалар бор. Бу ҳақда Ахборотлаштириш ва алоқа агентлигида ўтказилган матбуот анжуманида Давлат солиқ қўмитаси раиси ўринбосари Жаҳонгир Абдиев маълум қилди.
Унинг сўзларига кўра, бундай соҳаларга логистика, брокерлик, курьерлар ва риелторлар киради. Абдиев бу муаммони жарима ва жазо йўли билан эмас, балки мулоқот ва суҳбатлар орқали ҳал қилиш кераклигини таъкидлади.
Биз қонуний ишлашга нима тўсқинлик қилаётганини билиб, шу нарсани йўқ қилишга ёрдам берамиз, — деди Давлат солиқ қўмитаси раиси ўринбосари.
Мисол тариқасида хизмат кўрсатиш соҳасида, хусусан, умумий овқатланишдаги вазият келтирилди.
Кўпгина кафе ва ресторанларда официантлар кўпинча ноқонуний ишлайди. Давлат солиқ қўмитаси вакиллари бир нечта кафе ва ресторанлар эгалари билан учрашиб, бунга солиқ юкининг юқорилиги сабаб бўлганини аниқлади. Тез орада ушбу соҳаларда ягона ижтимоий тўлов ставкаси 1 фоизга туширилди.
Абдиев солиқ қўмитаси томонидан ҳудудларда ўтказилган йиғилишлар ҳақида ҳам тўхталиб ўтди. Бундай учрашувларнинг бирида тадбиркорлардан бири ноқонуний ишлашга мажбур бўлганини, бошқа чора йўқлигини айтди.
Биз унга вариантлар борлигини айтдик, бемалол ишлаш ва пул топиш мумкин бўлган механизмлар, воситалар ва имкониятларни кўрсатдик. Тадбиркор ҳайрон бўлиб, буларнинг барчасидан хабари йўқлигини айтди, — деди Абдиев.
Унинг сўзларига кўра, солиқ органлари ҳозир трансформация қилинмоқда — жазоловчи сифатида эмас, балки тадбиркорнинг ёрдамчиси ва дўсти сифатида ишламоқда.
Аввалроқ Ўзбекистонда йил бошидан бери харид чекини рўйхатдан ўтказган истеъмолчиларга 57,5 млрд сўм кэшбэк тўлангани ҳақида хабар берилган эди.
Изоҳ (0)