Bir necha kundirki, Toshkent iste’molchilari 2022-yilgi mavsumning yana bir yangiligi – xalq orasida “May olmalari” deb ataladigan erta pishar olmani tatib ko‘rish imkoniyatiga ega bo‘ldi. Bu haqda EastFruit xabar berdi.
Nomiga qaramay, bu olma navi aprel oyining ikkinchi yarmida yoki oxirlarida chakana savdoda paydo bo‘ladi.
Bu mavsumning birinchi yangi olmasi, shuning uchun u qimmat. Uzoq kutilgan meva bahosi 2021-yil hosilining kechpishar olmasidan o‘rtacha 7-8 baravar qimmatroq.
Joriy yilning 20—23-aprel kunlari Toshkent supermarketlarida ertapishar olmalar paydo bo‘ldi va 100 grammi 11 700 so‘mdan 12 999 so‘mgacha bo‘lgan narxlarda sotildi, ya’ni 1 kilo olma narxi 117 000 so‘mdan 129 990 so‘mgacha baholandi.
Ayni damda mahalliy ishlab chiqarilgan ushbu olma navi gilos va o‘riklardan so‘ng eng qimmat mevalardan biri bo‘lib, import ekzotik mevalardan qimmatroq turadi.
Taqqoslash uchun, 2022-yil 26-aprel holatiga ko‘ra, poytaxt supermarketlarida o‘tgan yilgi hosildagi olmalarning chakana narxi — 1 kg uchun 12 000 so‘mdan 23 000 so‘mgacha.
Eslatib o‘tamiz, 2021-yilda mavsumning ushbu yangiligi chakana savdolarda 19-aprelda 100 grammi 14 999 so‘m bo‘lgan, ya’ni kilogrammi 149 990 so‘m.
Boshqacha qilib aytganda, 2022-yilda may olmalari chakana savdoda o‘tgan yilgi bilan bir vaqtda sotuvga chiqqan bo‘lsa ham, 2021-yilga nisbatan o‘rtacha 18 foizga arzonroq narxlandi.
Bu farq joriy yilgi sovuq oqibatida hosil yo‘qotishlari kamroq bo‘lgani bilan bog‘lanmoqda.
Avvalroq kivi va mandarin arzonlagani, uzum va bulg‘or qalampiri keskin qimmatlashgani haqida xabar berilgan edi.
Izoh (0)