“O‘zbekiston metallurgiya kombinati”ning 2022-yilning birinchi choragidagi umumiy daromadi 2 trln so‘mni tashkil etdi. Bu haqda “Daryo”ga kompaniya moliyaviy hisobotidan ma’lum bo‘ldi.
Daromad 2021-yilga nisbatan 20 foizga o‘sgan. O‘tgan yilning yanvar—mart oylarida kompaniya 1,6 trln so‘m daromad qilgan edi. Shuningdek, bu davrda xarajatlar ham ko‘paydi — 1,1 trln so‘mdan 1,3 trln so‘mga yetdi.
“O‘zbekiston metallurgiya kombinati” yil boshidan beri 366,8 mlrd so‘m foyda ko‘rgan. Bu o‘tgan yilning shu davriga nisbatan 134,8 mlrd so‘mga ko‘p. Kompaniya 2021-yilning ilk choragida 232 mlrd so‘m sof foyda ko‘rgan edi.
Metallurgiya kombinati yanvar—mart oylariga ko‘ra 52,5 mlrd so‘m soliq to‘lagan.
“O‘zbekiston metallurgiya kombinati” qanday kompaniya?
“O‘zbekiston metallurgiya kombinati” aksiyadorlik jamiyati O‘zbekistondagi yеtakchi qora mеtallurgiya korxonasidir. Kombinat nеgizli soha bo‘lib, barcha boshqa korxonalar bilan aloqada bo‘lib turadi.
Kombinat tarkibida quyidagilar mavjud:
- Po‘lat eritish sexlari;
- Prokat ishlab chiqarish sexlari;
- Rangli metallar ishlab chiqarish sexi;
- Issiqlikni o‘tkazmaydigan materiallarni ishlab chiqarish sexi;
- Xalq iste’mol mollari ishlab chiqarish sexi;
- Respublika hududlari bo‘ylab qora metall parchalari va chiqindilari tayyorlash va qayta ishlash sexlari;
- “O‘zmetkombinat” AJ “Ikkilamchiqorametallar” boshqarmasining filiallari;
- Ferroqotishmalar ishlab chiqarish sexi.
Avvalroq “O‘zbekiston milliy elektr tarmoqlari” yil boshidan beri 1,5 trillion so‘m zarar ko‘rgani haqida xabar berilgan edi.
Izoh (0)