Ijtimoiy tarmoqlarda “Nurafshon TV” telekanalining Toshkent viloyati Olmaliq shahrida bo‘lib o‘tgan sayyor tibbiy qabul jarayonidan tayyorlangan videolavhasida bemorlar uy hayvonlarini tekshirish uchun mo‘ljallangan UTT apparati yordamida ko‘rikdan o‘tkazilganiga doir xabarlar tarqaldi. Viloyat Sog‘liqni saqlash boshqarmasi mazkur holatga munosabat bildirib, tibbiy ko‘rik jarayonida zamonaviy ultratovush uskunasidan foydalanilganini ma’lum qildi.
Ma’lum qilinishicha, Olmaliq shahridagi tibbiy ko‘rik jarayonida foydalanilgan UTT apparati ijtimoiy tarmoqlarda tarqalgan xabarlarda aytilganidek, Xitoyda ishlab chiqarilgan veterinar tekshiruvlarga mo‘ljallangan Esaote Aquila VET qurilmasi emas.
Ta’kidlanishicha, Esaote qurilmasi Italiya kompaniyasiga tegishli hisoblanadi va kompaniya tomonidan 2000-yillar boshida Esaote Akuila VET modeli ostida ham qurilma ishlab chiqarila boshlagan. Biroq videolavhada ko‘rsatilgan apparat esa Esaote Aquila PRO deb nomlanadi. U umumiy klinik ultratovush, ya’ni insonlarni tibbiy ko‘rikdan o‘tkazish, diagnostika qilish uchun mo‘ljallangan.
№531808045 seriyali mazkur uskuna Olmaliq shahar tug‘uruq kompleksiga 2008-yilda “Salomatlik-2” dasturi doirasida keltirilgan. U hozirgi kunga qadar soz holatda.
Esaote Akuila PRO apparati ham ixcham va foydalanish uchun qulay bo‘lgan portativ mobil qurilma hisoblangani tufayli undan sayyor tibbiy ko‘riklar va uyda yotib qolgan bemorlar tekshiruvida foydalaniladi.
Shuningdek, ultratovush diagnostika apparati tibbiyotning turli yo‘nalishlarida ishlatilishi va tana a’zolarining exografik tasvirini hosil qilib berishga xizmat qiladi. Bunda tasvirning yorqinligi va kontrast ko‘rsatkichlari asosiy sifat mezoni hisoblanadi. Ya’ni to‘qimalarni bir-biridan ajratish va tarkibiy tuzilmalarini ko‘rsata olish hisobiga UTT shifokori ichki a’zolar holatiga baho bera oladi. Qayd etilishicha, Esaote Akuila PRO apparati orqali olinayotgan tasvirlar ana shu talablarga javob beradi.
“Umuman, mamlakatimiz sog‘liqni saqlash tizimida bugungi kunda zamonaviy ultratovush uskunalari qo‘llanilmoqda. Shu o‘rinda bir misol: 2018-yilda birlamchi tizimda prenatal nuqsonlarni aniqlash maqsadida davlat tomonidan GE kompaniyasidan 200 ta, 2020-yilda qishloq shifokor punktlarida ishlatish uchun yana 800 ta so‘nggi rusumdagi statsionar apparatlar sotib olingan. Shunday ekan, blogerlardan ijtimoiy tarmoqlar orqali asossiz, tekshirilmagan va noto‘g‘ri ma’lumotlarni tarqatmasliklarini so‘raymiz”, — deya ta’kidlanadi munosabatda.
Izoh (0)