“Qishloq xo‘jaligi mahsulotlarini yetishtirish xarajatlarini moliyalashtirish va ularni xarid qilish tizimini takomillashtirish chora-tadbirlari to‘g‘risida”gi prezident qarori qabul qilindi. Bu haqda Telegram’dagi “Huquqiy axborot” kanali xabar qildi.
Qayd etilishicha, qaror bilan Bog‘dorchilik va issiqxona xo‘jaligini rivojlantirish jamg‘armasiga 12 oy muddatga, 11 oylik imtiyozli davr bilan 300 milliard so‘m budjet ssudasi yillik 10 foiz stavkada ajratilgan. Budjet ssudasi hisobidan qishloq xo‘jaligi korxonalariga meva, uzum, sabzavot, kartoshka, poliz ekinlari, gul, ko‘katlar va dorivor o‘simliklar, makkajo‘xori doni, dukkakli va moyli ekinlarni yetishtirish uchun moddiy-texnik resurslar, urug‘lik va ko‘chat yetkazib berish, xizmatlar ko‘rsatish uchun yillik 14 foizda qarz beriladi. Xuddi shunday qarz qayta ishlovchi, saqlovchi va eksport qiluvchilarga, “Agroservis operator” DUKga ekinlarni xarid qilish uchun talab etiladigan aylanma mablag‘larini to‘ldirish uchun ham beriladi.
“Agroservis operator” DUK tomonidan qishloq xo‘jaligi ekinlari yetishtirish uchun zarur bo‘lgan moddiy-texnik resurslar yetkazib berish, qarz shartnomasi asosida qishloq xo‘jaligi ekinlarining vegetatsiya davridan ortiq bo‘lmagan muddatga yillik 14 foizda amalga oshiriladi.
Eslatib o‘tamiz, Shavkat Mirziyoyev huzurida 27-aprel kuni o‘tkazilgan yig‘ilishda Qishloq xo‘jaligi vazirligiga yil yakuniga qadar 400 million dollarlik loyihalarni boshlash topshirilgan. Unga ko‘ra, Bog‘dorchilik agentligiga 1-mayga qadar 20 million dollar, natijaga qarab, yil yakuniga qadar yana 45 million dollar ajratiladi.
Izoh (0)