«Қишлоқ хўжалиги маҳсулотларини етиштириш харажатларини молиялаштириш ва уларни харид қилиш тизимини такомиллаштириш чора-тадбирлари тўғрисида»ги президент қарори қабул қилинди. Бу ҳақда Telegram’даги «Ҳуқуқий ахборот» канали хабар қилди.
Қайд этилишича, қарор билан Боғдорчилик ва иссиқхона хўжалигини ривожлантириш жамғармасига 12 ой муддатга, 11 ойлик имтиёзли давр билан 300 миллиард сўм бюджет ссудаси йиллик 10 фоиз ставкада ажратилган. Бюджет ссудаси ҳисобидан қишлоқ хўжалиги корхоналарига мева, узум, сабзавот, картошка, полиз экинлари, гул, кўкатлар ва доривор ўсимликлар, маккажўхори дони, дуккакли ва мойли экинларни етиштириш учун моддий-техник ресурслар, уруғлик ва кўчат етказиб бериш, хизматлар кўрсатиш учун йиллик 14 фоизда қарз берилади. Худди шундай қарз қайта ишловчи, сақловчи ва экспорт қилувчиларга, «Агросервис оператор» ДУКга экинларни харид қилиш учун талаб этиладиган айланма маблағларини тўлдириш учун ҳам берилади.
«Агросервис оператор» ДУК томонидан қишлоқ хўжалиги экинлари етиштириш учун зарур бўлган моддий-техник ресурслар етказиб бериш, қарз шартномаси асосида қишлоқ хўжалиги экинларининг вегетация давридан ортиқ бўлмаган муддатга йиллик 14 фоизда амалга оширилади.
Эслатиб ўтамиз, Шавкат Мирзиёев ҳузурида 27 апрель куни ўтказилган йиғилишда Қишлоқ хўжалиги вазирлигига йил якунига қадар 400 миллион долларлик лойиҳаларни бошлаш топширилган. Унга кўра, Боғдорчилик агентлигига 1 майга қадар 20 миллион доллар, натижага қараб, йил якунига қадар яна 45 миллион доллар ажратилади.
Изоҳ (0)