Rossiyaning eng yirik xususiy neft kompaniyasi Lukoil asoschisi Vagit Alekperov direktorlar kengashi va prezidentlik lavozimini tark etdi. Bu haqda kompaniya sayti xabar berdi.
13-aprel kuni Buyuk Britaniya Ukrainada davom etayotgan “maxsus harbiy operatsiya”ga javoban Rossiyaga qarshi so‘nggi cheklovlar doirasida Alekperovni sanksiyalar ro‘yxatiga kiritdi.
Sanksiyalar Buyuk Britaniyaga kirishni taqiqlash va bu mamlakatdagi barcha aktivlarni blokirovka qilishni o‘z ichiga oladi.
Alekperov Lukoil’ning 28,3 foiz ulushiga ega. Forbes jurnali uning boyligini 10,5 milliard dollarga baholaydi.
Lukoil dunyodagi eng yirik neft va gaz kompaniyalaridan biri bo‘lib, u jahon neft qazib olishning 2 foizidan ortig‘ini va tasdiqlangan uglevodorod zaxiralarining taxminan 1 foizini tashkil qiladi. Neft qazib olish bo‘yicha Rossiyada ikkinchi o‘rinda turadi.
Lukoil O‘zbekistonda bir nechta loyihalarga ega. Xususan, u 2020-yilda eng ko‘p soliq to‘lagan kompaniyalar o‘ntaligidan joy olgan.
Avvalroq bir paytlar neft platformasida oddiy ishchi bo‘lgan Alekperov o‘tgan yildan beri boyligining yarmidan ko‘pini yo‘qotgani haqida xabar qilingan edi.
Izoh (0)