O‘zbekistondagi aeroportlarni boshqarishga xorijiy kompaniyalar jalb qilinadi

O‘zbekistondagi xalqaro aeroportlarni boshqarishga xorijiy kompaniyalar jalb qilinadi. Bu haqda Sinxua agentligi xabar berdi.

Uzbekistan Airports boshqaruvi raisi Ra’no Jo‘rayeva chorshanba kuni Sinxua agentligiga bergan intervyusida bu boradagi dastlabki qadamlar qo‘yilganini bildirdi.

Masalan, bugungi kunda Samarqand xalqaro aeroportini rivojlantirishga 90 million dollarlik sarmoya kiritayotgan xususiy kompaniya bilan pilot loyiha amalga oshirmoqda.

Biz bu kompaniyaga butunlay aeroportni emas, balki aeroportning bir qancha funksiyalarini boshqarish huquqini topshirdik. Ayrim funksiyalar ularning tasarrufiga o‘tgan. Masalan, yo‘lovchilarga xizmat ko‘rsatish, yoqilg‘i ta’minoti, yuk va pochta jo‘natmalarini qayta ishlash, — deydi Ra’no Jo‘rayeva.

Ra’no Jo‘rayeva nafaqat investitsiya nuqtayi nazaridan, balki professional aeroport operatori sifatida ham kompaniyani raqobat asosida tanlash muhim deb hisoblaydi.

Agar biz operator sifatida ish tajribasiga ega bo‘lmagan kompaniyani aeroportga jalb qilsak, bu yo‘lovchilarga xizmat ko‘rsatish sifatiga va aeroportning normal ishlashiga katta ta’sir ko‘rsatadi. Biz uchun o‘z vazifasining mutaxassisi bo‘lgan professional kompaniyalarni tanlash muhim, — deydi Jo‘rayeva.

Uning ta’kidlashicha, hozirda Uzbekistan Airports ikkita loyiha tayyorladi. Birinchi shartnoma Air Marakanda xususiy kompaniyasi bilan imzolanib, Samarqand shahridagi xalqaro aeroportga xizmat ko‘rsatishni boshladi.

Ushbu kompaniya Myunxen va Istanbul xalqaro aeroportlari mutaxassislari bilan birgalikda O‘zbekiston uchun yagona bo‘lgan ORAT (Operatsion tayyorlik, faollashtirish va o‘tish dasturini) amalga oshirish ustida ishlamoqda.

Bu esa aeroportni ishga tushirishda juda ko‘p turli texnologik va biznes jarayonlarning murakkab tizimini sistemalashtirish va sinxronlashtirish imkonini beradi.

Bundan tashqari, Lufthansa Consulting, KPMG va Freshfiyelds Bruckhaus Deringer yangi aeroport faoliyatining moliyaviy va huquqiy imkoniyatlarini baholamoqda.

Mazkur tizim aeroportlar faoliyati sohasida ilg‘or texnologiyalarni joriy etish, aviakompaniyalar, yo‘lovchilar va aholi talabini qondirish, shuningdek, Samarqand xalqaro aeroportini yirik transport va turizm markaziga aylantirish imkonini beradi.

Hamkorlik 10 yildan ortiq muddat, balki 15-20 yil davom etadi. Bu juda qiyin jarayon, ayniqsa, aeroport boshqaruvi sohasida eng muhimi — yo‘lovchilar xavfsizligi. Shu bois Uzbekistan Airports AJ har bir aeroportning asosiy operatori bo‘lib qoladi, u xususiy asosda jalb qilingan barcha kompaniyalar faoliyatini tashkil etadi, — deya xulosa qildi Ra’no Jo‘rayeva.

Yaqinda O‘zbekiston prezidenti “Ishbilarmonlik muhitini yaxshilash va xususiy sektorni rivojlantirish orqali barqaror iqtisodiy o‘sish uchun shart-sharoit yaratish bo‘yicha navbatdagi islohotlar to‘g‘risida”gi farmonni imzolagan edi.

Hujjatga ko‘ra, ikki oy muddatda O‘zbekiston aeroporti va Toshkent xalqaro aeroportiga bo‘ysunuvchi mintaqaviy xalqaro aeroportlarni modernizatsiya qilish va ulardan foydalanish samaradorligini oshirish maqsadida ularni davlat-xususiy, xususiy sektor boshqaruviga o‘tkazish to‘g‘risida qaror loyihasini tayyorlash topshirildi.

Avvalroq Samarqandda 170 mln dollarga qayta ta’mirlangan xalqaro aeroport foydalanishga topshirilgani haqida xabar berilgan edi.