Россиянинг энг йирик хусусий нефть компанияси Lukoil асосчиси Вагит Алекперов директорлар кенгаши ва президентлик лавозимини тарк этди. Бу ҳақда компания сайти хабар берди.
13 апрель куни Буюк Британия Украинада давом этаётган «махсус ҳарбий операция»га жавобан Россияга қарши сўнгги чекловлар доирасида Алекперовни санкциялар рўйхатига киритди.
Санкциялар Буюк Британияга киришни тақиқлаш ва бу мамлакатдаги барча активларни блокировка қилишни ўз ичига олади.
Алекперов Lukoil’нинг 28,3 фоиз улушига эга. Forbes журнали унинг бойлигини 10,5 миллиард долларга баҳолайди.
Lukoil дунёдаги энг йирик нефть ва газ компанияларидан бири бўлиб, у жаҳон нефть қазиб олишнинг 2 фоизидан ортиғини ва тасдиқланган углеводород захираларининг тахминан 1 фоизини ташкил қилади. Нефть қазиб олиш бўйича Россияда иккинчи ўринда туради.
Lukoil Ўзбекистонда бир нечта лойиҳаларга эга. Хусусан, у 2020 йилда энг кўп солиқ тўлаган компаниялар ўнталигидан жой олган.
Аввалроқ бир пайтлар нефть платформасида оддий ишчи бўлган Алекперов ўтган йилдан бери бойлигининг ярмидан кўпини йўқотгани ҳақида хабар қилинган эди.
Изоҳ (0)