Rossiyalik harbiy xizmatchilar Chernobil atom elektr stansiyasini tark etishni boshladi. Bu haqda ismini oshkor etmagan amerikalik harbiy amaldorga tayanib, France 24 nashri xabar berdi.
“Chernobil — ruslar o‘z qo‘shinlarini ko‘chirayotgan joylardan biri, ular Chernobil AESni tark etib, Belarusga ketmoqda. Ular ortga qaytyapti deb o‘ylaymiz. Hozirda ular to‘liq ketib bo‘lgan deya olmayman”, — deydi AFP manbasi.
Rossiya qo‘shinlari urushning birinchi kunidayoq Chernobil AES hududini egallagan edi. 9-mart kuni “Ukrenergo” AES elektr uzatish liniyalaridagi avariya tufayli to‘liq quvvatsizlangani to‘g‘risida xabar berdi. Rossiya mazkur holatda Ukraina tomonini ayblagan. Ularning so‘zlariga ko‘ra, “ukrainalik millatchilar” elektr liniyalariga o‘q uzganidan so‘ng AES elektrsiz qolgan. 13-mart kuni “Ukrenergo” Chernobil AESda ta’mirlash ishlarini yakunlab, elektr ta’minotini qayta tikladi. 17-mart kuni Moskva va Kiyev Chernobil AESni birgalikda qo‘riqlashga kelishib olgan.
Ukraina tomoni qariyb bir oy davomida stansiyada bitta smena xodimlar ishlaganini ma’lum qilgandi. Mamlakat bosh vaziri o‘rinbosari Irina Vereshuk AESdagi ishchilar o‘tgan haftadagina almashtirilganini aytgan edi.
Rossiya—Ukraina urushiga oid tezkor, ishonchli yangiliklar va ma’lumotlarni “Daryo”ning Live sahifasi orqali kuzatib boring → @Daryo_Live
Izoh (0)