“Putin global oziq-ovqat inqirozini yuzaga keltirdi”. AQSH Rossiyani Qora dengizda salkam 100 ta kemani to‘xtatib qo‘yganlikda aybladi

Rossiyaning Ukrainaga bostirib kirishi mamlakatda kuchli oziq-ovqat tanqisligini yuzaga keltirib, global oziq-ovqat inqirozi uchun zamin yaratdi. Bu haqda BMT Xavfsizlik kengashining yig‘ilishida AQSH davlat kotibi o‘rinbosari Vendi Sherman ma’lum qildi, deb xabar beradi CNN.

Uning ma’lumotlariga ko‘ra, rus harbiylari Qora dengiz akvatoriyasidan tovarlarni tashiyotgan kamida uchta kemani o‘qqa tutgan. Shuningdek, Shermanning ta’kidlashicha, Rossiya Harbiy-dengiz kuchlari Ukraina portlariga borishni bloklab, Kiyevni don eksport qilish hamda oziq-ovqat mahsulotlari ortilgan 94 ta kemaning O‘rta Yer dengiziga chiqish imkoniyatidan mahrum qilmoqda.Uning ta’kidlashicha, Ukraina va Rossiya qishloq xo‘jaligi mahsulotlarini ishlab chiqaruvchi yirik davlatlardan bo‘lib qolmoqda — dunyodagi bug‘doy eksportining 30 foizi, makkajo‘xorining 20 foizi hamda kungaboqar yog‘i eksportining 75 foizi Qora dengiz mintaqasi hisobiga to‘g‘ri keladi.

Ukrainaning BMTdagi doimiy vakili Sergey Kisilsa mamlakatdagi gumanitar inqiroz xavfi haqida ma’lum qilgan.

“Rus qo‘shinlari o‘zining dastlabki tezkor urush rejasi muvaffaqqiyatsizlikka uchragach, ‘B’ rejaga o‘tdi. Ushbu reja mamlakat siyosiy rahbariyati va xalqini qo‘rqitish hamda uni taslim bo‘lishda undash uchun butun Ukrainada gumanitar falokatni yuzaga keltirishni va yurtimning qishloq xo‘jaligi potensialini yo‘q qilishni o‘z ichiga oladi”, — deydi Kisilsa.