Ukraina prezidenti Vladimir Zelenskiy AQSH davlat rahbari Jo Bayden bilan telefon suhbatida unga Kiyev hamda Moskva o‘rtasidagi muzokaralarning borishi haqida ma’lumot berdi, deya xabar qildi Oq uy matbuot xizmati.
“Zelenskiy prezident Baydenga Ukraina va Rossiya muzokaralarining maqomi haqida axborot berdi”, — deyiladi xabarda.
O‘z navbatida Bayden Zelenskiyga AQSHning Ukraina hukumatiga 500 million dollar miqdorida to‘g‘ridan to‘g‘ri budjet yordami taqdim etishga tayyorligini bildirgan.
Bundan tashqari, ikki davlat rahbarlari AQSH va uning ittifoqchilari tomonidan berilayotgan ijtimoiy hamda harbiy yordam masalalari, shuningdek, Rossiyaga nisbatan qo‘llanadigan yangi sanksiyalarni muhokama qilgan.
Rossiya Ukrainada maxsus harbiy operatsiyalarni boshlaganidan beri tomonlar nizoni tinchlik yo‘li bilan hal etish maqsadida bir necha marta muzokaralar o‘tkazdi. 29-mart kuni Moskva va Kiyev delegatsiyalari Istanbulda muzokaralarning yana bir raundini o‘tkazgan. Uchrashuv yakuniga ko‘ra, Rossiya Ukrainadan vaziyatni siyosiy yo‘l bilan hal etish yuzasidan yozma takliflarni olgan.
Ukraina delegatsiyasi rahbari David Araxamiya Kiyevning davlatga betaraflik maqomi berilishi ko‘zda tutilgan, xavfsizlik kafolatlari tizimini taklif etayotganini aytgan. Uning so‘zlariga ko‘ra mazkur tizimga BMT xavfsizlik kengashining doimiy a’zolari, shuningdek Turkiya, Germaniya, Italiya, Isroil, Polsha va Kanada kafil bo‘ladi.
Rossiya delegatsiyasi rahbari Vladimir Medinskiy ham Kiyevdan Ukrainaga betaraflik va yadro qurolidan holi bo‘lishlik maqomi haqidagi takliflar olinganini tasdiqladi. U Ukraina takliflarida barcha turdagi ommaviy qirg‘in qurollarini ishlab chiqarish va mamlakat hududiga joylashtirishdan voz kechish ko‘zda tutilganini ma’lum qilgan. Medinskiy Kiyev takliflarida Rossiyaning Ukrainani Yevropa ittifoqi tarkibiga kirishiga qarshi chiqmasligi hisobga olinganini ta’kidlagan.
“Ukraina Qrim va Donbassni harbiy yo‘l bilan qaytarish fikridan yiroq. Ukrainaning xavfsizlik kafolatlari bo‘yicha takliflari Qrim hamda Donbassga taalluqli emas. Rossiya Ukrainaning Yevropa ittifoqiga kirishiga qarshi emas”, — degan Rossiya delegatsiyasi vakili Vladimir Medinskiy.
AQSH davlat kotibi Entoni Blinken Rossiya—Ukraina muzokaralarining borishi yuzasidan o‘z izohida Vashingtonning Moskva bayonotlariga emas, balki Kiyev harakatlariga qarab mo‘ljalni olishini qayd etgan.
“Rossiya bergan va’da va uning amalda bajarilishi qanday ketayotganini farqlab olishi kerak. Biz va’dalarning bajarilishiga e’tibor qaratamiz”, — degan Blinken.
Rossiya—Ukraina urushiga oid tezkor, ishonchli yangiliklar va ma’lumotlarni “Daryo”ning Live sahifasi orqali kuzatib boring → @Daryo_Live
Izoh (0)