Россиялик ҳарбий хизматчилар Чернобил атом электр станциясини тарк этишни бошлади. Бу ҳақда исмини ошкор этмаган америкалик ҳарбий амалдорга таяниб, France 24 нашри хабар берди.
«Чернобил — руслар ўз қўшинларини кўчираётган жойлардан бири, улар Чернобил АЭСни тарк этиб, Беларусга кетмоқда. Улар ортга қайтяпти деб ўйлаймиз. Ҳозирда улар тўлиқ кетиб бўлган дея олмайман», — дейди AFP манбаси.
Россия қўшинлари урушнинг биринчи кунидаёқ Чернобил АЭС ҳудудини эгаллаган эди. 9 март куни «Укрэнерго» АЭС электр узатиш линияларидаги авария туфайли тўлиқ қувватсизлангани тўғрисида хабар берди. Россия мазкур ҳолатда Украина томонини айблаган. Уларнинг сўзларига кўра, «украиналик миллатчилар» электр линияларига ўқ узганидан сўнг АЭС электрсиз қолган. 13 март куни «Укрэнерго» Чернобил АЭСда таъмирлаш ишларини якунлаб, электр таъминотини қайта тиклади. 17 март куни Москва ва Киев Чернобил АЭСни биргаликда қўриқлашга келишиб олган.
Украина томони қарийб бир ой давомида станцияда битта смена ходимлар ишлаганини маълум қилганди. Мамлакат бош вазири ўринбосари Ирина Верешук АЭСдаги ишчилар ўтган ҳафтадагина алмаштирилганини айтган эди.
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Изоҳ (0)