«Путин глобал озиқ-овқат инқирозини юзага келтирди». АҚШ Россияни Қора денгизда салкам 100 та кемани тўхтатиб қўйганликда айблади

Россиянинг Украинага бостириб кириши мамлакатда кучли озиқ-овқат танқислигини юзага келтириб, глобал озиқ-овқат инқирози учун замин яратди. Бу ҳақда БМТ Хавфсизлик кенгашининг йиғилишида АҚШ давлат котиби ўринбосари Венди Шерман маълум қилди, деб хабар беради CNN.

Унинг маълумотларига кўра, рус ҳарбийлари Қора денгиз акваториясидан товарларни ташиётган камида учта кемани ўққа тутган. Шунингдек, Шерманнинг таъкидлашича, Россия Ҳарбий-денгиз кучлари Украина портларига боришни блоклаб, Киевни дон экспорт қилиш ҳамда озиқ-овқат маҳсулотлари ортилган 94 та кеманинг Ўрта Ер денгизига чиқиш имкониятидан маҳрум қилмоқда.Унинг таъкидлашича, Украина ва Россия қишлоқ хўжалиги маҳсулотларини ишлаб чиқарувчи йирик давлатлардан бўлиб қолмоқда — дунёдаги буғдой экспортининг 30 фоизи, маккажўхорининг 20 фоизи ҳамда кунгабоқар ёғи экспортининг 75 фоизи Қора денгиз минтақаси ҳисобига тўғри келади.

Украинанинг БМТдаги доимий вакили Сергей Кисилса мамлакатдаги гуманитар инқироз хавфи ҳақида маълум қилган.

«Рус қўшинлари ўзининг дастлабки тезкор уруш режаси муваффаққиятсизликка учрагач, ‘Б’ режага ўтди. Ушбу режа мамлакат сиёсий раҳбарияти ва халқини қўрқитиш ҳамда уни таслим бўлишда ундаш учун бутун Украинада гуманитар фалокатни юзага келтиришни ва юртимнинг қишлоқ хўжалиги потенциалини йўқ қилишни ўз ичига олади», — дейди Кисилса.