Cathay Pacific Airways kompaniyasi Nyu-York—Gonkong qatnovini Rossiya havo hududiga kirmaslik uchun o‘zgartirishni rejalashtirmoqda. Shu sababli dunyodagi eng uzun yo‘lovchi reysi paydo bo‘ladi. Bu haqda Bloomberg xabar bermoqda.
Ma’lumotlarga ko‘ra, aviakompaniya Jon Kennedi xalqaro aeroportidan Atlantika okeani, Buyuk Britaniya, Janubiy Yevropa va Markaziy Osiyo ustidan parvoz qilishni rejalashtirmoqda.
FlightRadar24 ma’lumotlariga ko‘ra, 16,618 kilometrlik parvozga taxminan 17 soat vaqt ketadi. Bu borada avvalgi eng uzun masofali ko‘rsatkich 17,5 soat davom etgan 15,349 kilometrlik Singapur—Nyu-York yo‘nalishi edi.
Cathay vakilining aytishicha, yangi yo‘nalishda Airbus SE’ning A350-1000 samolyotidan foydalaniladi.
Bir nechta aviakompaniyalar Rossiyani aylanib o‘tish maqsadida, asosan, Osiyo va Yevropa o‘rtasida yo‘nalishlarni rejalashtirgan. Japan Airlines o‘z yo‘nalishini Tokioning Haneda aeroportidan Sibir ustidan uchish o‘rniga Alyaska va Kanada orqali Londonning Xitrou aeroportiga yo‘naltirdi. Bu esa 11 soat 55 daqiqalik yo‘lga yana to‘rt yarim soat qo‘shdi.
Bunday parvozlar neft narxining yuqoriligi tufayli duch keladigan xarajatlarni hisobga olgan holda vaqtinchalik bo‘lishi mumkin.
Avvalroq Rossiyada Visa va Mastercard ochish uchun O‘zbekistonga parvozlar tashkil qilina boshlagani haqida xabar berilgan edi.
Izoh (0)